Otyrysqa Parlament Senatynyń depýtaty Álimjan Qurtaev qatysty.
Saladaǵy jumystardyń atqarylý barysyn baıandaǵan oblystyq qurylys basqarmasynyń basshysy Quttybek Jamashevtyń málimetinshe, 2017 jyly óńirde qurylysy josparlanǵan 196 nysannyń 121-in paıdalanýǵa tapsyrý kózdelse, qalǵany keler jylǵa ótpeli eken. El ıgiligine beriletin nysandardyń 29-y bilim berý, 34-i densaýlyq saqtaý, 1-i áleýmettik qamtý, 3-i mádenıet salasyna baılanysty, al 42 nysan turǵyn úı ǵımaratyna jatady. Sonymen birge, 8 obekti ınjenerlik ınfraqurylymǵa, 1 nysan monoqalaǵa, 1-i aýyl sharýashylyǵy, 1-i abattandyrý salasyna qatysty jáne 1-i qorshaǵan ortany qorǵaý nysandaryna jatatyn ǵımarattar bolyp tabylady. Al jyl basynan beri osy 121 nysannyń 15-i qoldanysqa berilgen. Olardyń 5 nysany bilim berý obektisi, 4-i densaýlyq saqtaý, 1-i áleýmettik qamtý, 1-i turǵyn úı bolsa, 1-i qorshaǵan ortany qorǵaý jáne 3-i ınjenerlik-kommýnıkasııalyq nysandar.
Oblys azamattaryn turǵyn úımen qamtamasyz etý boıynsha arnaıy toqtalǵan basqarma basshysy bıyl 10879 páterli 226 turǵyn úıdiń (aýdany 737,6 myń sh.m.) qurylysy júrip jatsa, jyl sońyna deıin sonyń 6375 páterden turatyn 115 úıi (aýdany 388,7 myń sh.m.) kezegin kútken qojaıyndaryna tapsyrylmaq.
Keltirilgen maǵlumattardy muqııat tyńdaǵan oblys ákimi Shymkenttegi kóp qabatty úıler qurylysyn kóbeıtý qajettigine toqtaldy. Ol úshin tıisti qarjy kózderin kóptep tartý kerektigin aıtqan Janseıit Qanseıituly baspanalardy salarda sapasy men sáýletine, úı ishiniń jobasyna mán berýdi tapsyrdy.
«Turǵyn úılerdi salýda otbasyn qurmaǵan boıdaq azamattar úshin bir, bir jarym bólmeli páterlerdi kóbeıtý qajet. Sonymen birge, otbasylyq jáne stýdenttik jataqhanalardyń sanyn arttyryp, stýdentter úshin arnaıy qalashyq boı kóterýi kerek. Al úı qurylysynda jańa tásilderdi qoldanyp, ózimizde óndiriletin zamanaýı, sapaly materıaldardy kádege jaratýdy bastańyzdar. Eń bastysy, turǵyn úılerdiń baǵasyn halyqtyń qaltasyna qonymdy bolatyndaı eseptep, ony arzandatý jaǵyn qarastyryńyzdar», – dedi J.Túımebaev.
Sondaı-aq, jıynda ákim áleýmettik nysandarǵa jatatyn mektep, balabaqsha, medısınalyq mekemelerdi salarda daıyndalatyn jobalyq smetalyq qujattardy (JSQ) ázirleýde qujattardyń uzaq merzimge sozylatynyn synǵa aldy. Bul rette, arnaıy bekitilgen standarttar negizinde jumys isteýdi qatań tapsyrǵan óńir basshysy halyqqa tezirek qolaıly jaǵdaı jasaý máselesin esten shyǵarmaýdy eskertti.