«Astana arlandarynyń» kapıtany, 52 kılogramda sharshy alańǵa shyqqan Oljas Sáttibaev qarsylasyna ese jiberdi.
Oljas Sáttibaev pen Iosbanı Veıtıa arasyndaǵy jekpe-jektiń birinshi raýndy kýbalyq boksshynyń basymdylyǵymen ótti. Kezdesýdiń qalǵan bóliginde de Oljas qarsylasy Veıtıany bilgeninen jańyldyrýǵa tyrysqan. Áıtse de, kýbalyq boksshy Sáttibaevtyń oılaǵanyn júzege asyrýǵa múmkindik qaldyrmady.
Qos boksshy 2015 jylǵy fınalda jolyǵyp, Oljas Sáttibaev jeńiske jetken bolatyn. Fınaldyq jekpe-jek aldynda Oljastyń ózi eki jyl burynǵy jeńisin qaıtalaıtynyn aıtqan edi. О́kinishke qaraı, Sáttibaev sózinde tura alǵan joq.
Dúnıejúzilik boks serııasynyń (WSB) jetinshi maýsymdaǵy fınaldyq jekpe-jegi dál qazir Astanadaǵy «Qazaqstan» sport kesheninde ótip jatyr. Ázirge 5:2 esebimen kýbalyqtar alda keledi.