- Shyny kerek, alǵashqy oıynǵa qaraǵanda «Legııa» búgin bizden jaqsyraq oınady. Qarsylastarymyzdyń bir-eki múmkindigi bolsa, bizde bireý ǵana boldy. Sebebi, búgin komandam úlken qysymnyń astynda oınaýyna týra keldi. «Astananyń» osymen úshinshi ret Chempıondar lıgasynyń nemese Eýropa lıgasynyń toptyq kezeńinde oınaýyna múmkindik týyp tur. Biz úshin bul úlken jetistik. Osy oraıda búkil Qazaqstandy, «Astananyń» búkil jankúıerin quttyqtaǵym keledi. Ujymymyzda qyzmet etetin árbir adam, fýtbolshy, bapkerlik alqada júrgen árbir jannyń buǵan qosqan úlesi zor. Bul matchtyń qıyn bolatynyn aldyn ala bilip keldik. Árıne, osyndaı úlken komandalarmen básekelesý arqyly chempıonatymyzdyń deńgeıi de arta túsedi. Bul oıynda tipti, qaptal qorǵaýshysy Abzal Beısebekovtiń de shabýylǵa aralasýyna týra keldi. Sonymen qatar, Marın de uzaq ýaqytqa qatardan shyǵyp qalǵan syńaıly.
- Eki fýtbolshyny tym erte aýystyrý oıynǵa qatty áser etken joq pa?
- Menińshe, bári der kezinde jasaldy. Bizde shabýylda azdap qıyndyqtar boldy. Alǵy shepte óner kórsetetin oıynshylarymyz azdaý.
- Astana qalasynda ortalyq alańda myńdaǵan jankúıer alańǵa shyǵyp, matchty tamashalady. Olar sizdiń gol jibergendegi jaǵdaıyńyz qandaı bolǵanyn surap jatyr? Júregińiz ornynda ma? Densaýlyǵyńyz?
- Shyny kerek, bapkerlerge artylar júktiń salmaǵy óte aýyr. Bizdi qoldaǵan jankúıerlerimizge alǵysymyz sheksiz. «Astananyń» qurylǵanyna kóp ýaqyt bolmasa da Qazaqstandy Eýropada laıyqty deńgeıde tanytyp júrgen birden bir klýb dep aıtýǵa bolady. Bul biz úshin úlken jetistik. Úsh jyl buryn osynda kelgenimde eýrokýboqtyq oıyndar týraly asa qatty oılamaıtyn edi. Al sońǵy úsh jylda turaqty túrde kári qurlyqtyń jarystarynan qalmaı keledi. Taǵy bir aıta keterim, «Legııa» óte myqty ujym. Bul komandanyń jankúıerleri de, bilikti jattyqtyrýshylary da bar. Olar úshin bári jasalǵan. Alǵashqy oıynda biz óz jerimizde myqty bolsaq, búgin «Legııa» myqtylyǵyn dáleldedi.
- Sizdiń «Astanamen» kelisimshartyńyz osy jyly aıaqtalady. Aldaǵy ýaqytta ony uzartý josparyńyzda bar ma?
- Mundaı aýyr matchtan keıin birden jaýap berý ońaı emes. «Astana» Eýropada jaqsy óner kórsetip júr. Degenmen, bizdegi fýtbolda biraz jaıtty ózgertkim keledi. Durys baǵytta kele jatyrmyz. Kelisimshartty uzartý jaǵyn aldaǵy ýaqytta talqylaıtyn bolamyz.
- Úshinshi irikteý kezeńindegi barlyq oıyndar aıaqtaldy. Kelesi kezeńge shyqqan on komanda anyqtaldy. Endigi pleı-offta qarsylas komanda qaısysy bolǵanyn qalar edińiz?
- "Marıbor", "Olımpıakos", "Kopengagon", "Seltı", APOEL. Bul komandalardyń bárin favorıtter qatarynda esepteımin.
- Mokınniń jaraqatty qanshalyqty aýyr?
- Shynymdy aıtsam, bilmeımin. Qatty soqqydan keıin aıaǵy qanaǵanyn kórdim. Sózimdi qorytaıyn. «Legııaǵa» sáttilik tileımin! Eýropa lıgasynyń toptyq kezeńine joldama alýyna tilektespin!
Aıan ÁBDÝÁLI, "Egemen Qazaqstan"