Qos oqıǵa da Gollıvýd serıaldaryndaǵy qandy qasapty eske túsiredi. Eki jasóspirim ózderi quralyptas zamandasyn taıaqqa ońdyrmaı jyǵýmen shektelse bir sári. Travmatıkalyq tapanshamen birneshe ret atyp, 39 sekýndqa ǵana sozylǵan tóbeles barysynda zábir shegýshi dene jaraqatyn alǵan.
Al, ekinshi oqıǵa toptyq jaǵa jyrtysýǵa jalǵasyp, sholaq myltyqtan atylǵan oqtan 19 jastaǵy Erbol Hamıtov degen kolledj stýdenti jaralanyp, aýyr jaǵdaıda aýrýhanaǵa jetkizilgen.
№ 1 qalalyq aýrýhananyń bas dárigeri Galına Mametovanyń aıtýynsha, naýqastyń bir aıaǵyn tizeden kesýge týra kelgen. Hali áli máz emes. Basy jarylyp, tisteri synǵan. Japa shegýshiniń ákesi Ǵalymkereı Qusaıynovtyń sózine qaraǵanda, ustalǵandardyń arasynda qarý qoldanýshylar joq kórinedi. Qashyp ketse kerek. Ol naǵyz qylmyskerler jaýapkershilikten sytylyp kete me dep alańdaıdy.
Oblystyq ishki ister departamentiniń baspasóz qyzmeti kúdiktilerdiń ustalǵany, Qylmystyq kodekstiń 293-shi, 99-shy baptary boıynsha («Buzaqylyq» jáne «Kisige qastandyq jasaý»), qylmystyq is qozǵalǵany jóninde málimdeme taratty.
О́mir ESQALI, «Egemen Qazaqstan»
Soltústik Qazaqstan oblysy