BQO jolaýshylar kóligi jáne avtomobıl joldary basqarmasynyń basshysy Mırjan Satqanovtyń aıtýynsha, osy qarjyǵa 126 km jol jóndelmekshi. Atap aıtqanda, Chapaev-Jańaqala-Saıqyn jáne Oral-Kırsanov baǵytyndaǵy joldar retke keltirilýde. Sol sekildi Barbastaý-Aqjaıyq-Inder jolynyń 0-43 shaqyrym aralyǵy da jóndelýde. Kúrdeli jóndeletin Úlken Shaǵan-Peremetnyı-Vechnyı jolynyń mańyzdylyǵy sol, ol respýblıkalyq Oral-Atyraý jáne Oral-Tasqala-RF shekarasy joldaryn jalǵaıdy.
Bıyl sondaı-aq respýblıkalyq mańyzy bar joldardy jóndeý men ustaýǵa 15 mlrd astam teńge qaraldy. Bul qarjyǵa Oral-Tasqala-RF shekarasy (4-104 km, sonyń 54 shaqyrymy), Chapaev-Jalpaqtal-Qaztalov-RF shekarasy (97-157 km,12,63 shaqyrymy), Qaztalov-Jánibek-RF shekarasy, Samara-Shymkent - (490-526 km, 36 shaqyrymy), Oral-Atyraý ( 27-108 km, 81 shaqyrymy) jóndelmekshi.
Eske sala keteıik, óńirdegi avtomobıl joldarynyń jalpy uzyndyǵy 6530,1 shaqyrym bolsa, sonyń 1392,55 shaqyrymy - respýblıkalyq, 5137,55 shaqyrymy - oblystyq jáne aýdandyq mańyzy bar joldar. Bıyl osy joldardyń barlyǵy 500 shaqyrymyn jóndeý kózdelýde.