Bul joly «Astananyń» qaqpasyn Nenad Erıch qorǵady. «Seltık» dese qolynan dop sýsı beretin Aleksandr Mokındi bapkerlerdiń dem aldyra turǵany bir esepten durys ta boldy.
Alǵashqy mınýttardan-aq oıynnyń alma-kezek shabýylǵa toly bolatyny baıqalyp qaldy. «Seltıktiń» alańnyń ár tusynan at qoıǵan is-qımylyna «Astana» qaımyqpaı jaýap berip otyrdy. Al, sondaı bir sátte Patrık Tvýmasıdiń alystan tepken doby «Seltıktiń» qorǵaýshylaryn selk etkizgendeı de boldy. Ras, qonaqtar da qarap qalmady: sýmań qaqqan surmergenderi eki-úsh ret bizdiń qaqpaǵa tónip kelip, ses kórsetip ketip jatty. О́kinishke qaraı, kezdesýdiń 13-mınýtynda bizdiń orta tustaǵy oıynnyń berekesin keltirip júrgen havbegimiz Laslo Klıaınhaısler jaraqat alyp qaldy. Onyń ornyna Srdjan Grahovas alańǵa shyqty.
Matchtyń 27-mınýtynda kezekti shabýyldyń birinde Dmıtrıı Shomko aıyp alańynyń syrtynan shirene tepken. Sol kezde qonaqtardyń qorǵaýshysy Krıstofer Aıer dopty qaıtaramyn dep, óz qaqpashysyn qapy qaldyrdy. Qatty tebilgen dop baǵytyn kúrt ózgertip, qaqpanyń oń jaq buryshyn solq etkizgen bolatyn.
Arada jeti mınýttaı ýaqyt ótkende «Seltıktiń» shabýylshysy Skott Sınkler jerlesterimizdiń aıyp alańyna sol qanattan buzyp-jaryp kirdi de, týra «toǵyzdyqty» dál kózdedi. Sóıtip, komandalar úziliske teń esep jaǵdaıynda ketti. Úzilisten keıin alańǵa Marın Tomasovty almastyrǵan Abzal Beısebekov shyqty. Bul ózgeristiń oıyn barysynda az paıdasyn tıgizbegenin aıta ketý kerek.
Matchtyń 48-mınýtynda aıyp alańyna áýelete berilgen dop keıin serpilgen kezde «Astananyń» jartylaı qorǵaýshysy Serikjan Mýjıkov mergendik tanytyp, gol sanyn ekige jetkizdi. Ile-shala, Shomkodan pas alǵan Patrık Tvýması esepti 3:1 qylyp ózgertti. Osy goldan keıin «Seltık» shynymen de sasaıyn dedi. «Astana Arenaǵa» jıylǵan myń san kórermenniń qıqýy da jyǵylǵanǵa soqqy bolyp tıgendeı. Sasqany sol emes pe, qonaqtardyń bapkeri Brendon Rodjers birinen soń biri úsh oıynshyny almastyrdy. Endi, qonaqtar taıly-tuıaǵy qalmaı shabýylǵa umtylǵan. Mine, osyndaı sáttiń urymtal tusyn sheber paıdalanǵan elorda fýtbolshylary qonaqtardy qarsy shabýylmen qapy qaldyrdy. Tvýsması kezdesýdiń 69-mınýtynda qaqpashy Gordonnan aılasyn asyryp, tórtinshi goldy salǵan edi. Tórtinshi dop torǵa túskende sónýge aınalǵan úmit oty qaıtadan lap etip, jankúıer jazǵan «Astana Arenadan» aspanǵa ushyp kete jazdaǵan. Biraq, qýanysh uzaqqa barmady. Aldymen Olıver Ncham oıynnyń 82-mınýtynda, odan keıin Grıffıts sońǵy mınýtta eki gol soǵyp, aptyǵymyzdy sý sepkendeı basty.
Degenmen, «Astananyń» myńdaǵan jankúıerleri aldynda namysyn aıaqqa taptatpaǵan órligi unady. «Erler yrǵasyp synasady» degen, ózinen kúshi basym qarsylaspen aqyryna deıin alysyp, keýdesin bastyrmaǵan Stanımır Stoılov shákirtteri qalaı bolǵan kúnde de ózderiniń hám kúli qazaq fýtbolynyń bedelin qorǵap qalǵan edi.
Sonymen, «Astana» Chempıondar lıgasyndaǵy joryǵyn aıaqtady. Al aldaǵy ýaqytta óner kórsetetin Eýropa lıgasy synyna 48 klýb qatysady. «Astananyń» Eýropa lıgasynyń toptyq kezeńinde qarsylastary juma kúni belgili bolady.
«Astana» (Astana, Qazaqstan) – «Seltık» (Glazgo, Shotlandııa) 4:3 (1:1). Birinshi oıyn: 0:5. Goldar: Aıer – avtogol 27 (1:0), Sınkler 34 (1:1), Mýjıkov 48 (2:1), Tvýması 49 (3:1), Tvýması 69 (4:1), Ncham 82 (4:2), Grıffıts 90 (4:3) Eskertýler: Postnıkov 70, Shomko 82, Grahovas 90+3 «Astana»: Erıch, Shıtov, Anıchıch, Klıaınhaısler (Grahovas 13), Mýjıkov, Tomasov (Beısebekov 46, Taǵybergen 81), Maevskıı, Tvýması, Kabananga, Postnıkov, Shomko «Seltık»: Gordon, Bıtton, Braýn, Grıffıts, Sınkler (Armstrong 65), Ncham, Lýstıg, Aıer, Makgregor (Rogıch 46), Forrest (Relston 57), Tırnı
Qaırat ÁBILDA, «Egemen Qazaqstan»