Astanada «ARMI-2017» halyqaralyq áskerı oıyndardyń qorytyndysy jarııalandy. Atalǵan baspasóz jıynyna birqatar áskerı qyzmetkerler qatysty.
Esterińizde bolsa, Qazaqstan Qarýly Kúshteriniń quramasy «ARMI-2017» halyqaralyq oıyndarynda jalpy komandalyq úshinshi oryndy enshilegen bolatyn. Sarbazdardyń ázirligin teksergen saıysqa álemniń 29 elinen 150 komanda qatysty. Dalalyq, áýe jáne teńiz mashyǵy sekildi dodalar qorytyndysy boıynsha, Reseı Federasııasynyń komandasy birinshi oryndy, Qytaı elinen kelgen «jýngolar» ekinshi oryndy ıelendi. Qazaq áskeriniń abyroıyn halyqaralyq básekede 350-den astam jaýynger qorǵaǵan eken. Baspasóz konferensııasyna kelgen spıkerler «toǵyzynshy aýmaqtyń» qarýly kúshteri tóreshiler alqasy tarapynan joǵary baǵaǵa ıe bolǵanyn málimdedi.
Jarys qorytyndysy boıynsha Qazaqstan qarýly kúshteriniń qorjynynda 3 altyn, 7 kúmis jáne 5 qola medal bar. Básekeniń saltanatty jabylý rásimine qatysqan Qorǵanys mınıstri, general-polkovnık Sáken Jasuzaqov halyqaralyq oıyndar dostyqtyń, halyqaralyq yntymaqtastyqtyń, beıbitshilik pen nıettestiktiń jańa nyshanyna aınalyp, aıryqsha mazmuny jáne ǵalamat aýqymymen erekshelenetinine toqtalǵan.
Spıkerlerdiń sózine súıensek, «ARMI-2017» saıysynda qazaqstandyq tankishiler bıatlon jarysynda 1 saǵat 45 mınýt 41 sekýnd nátıjesin kórsetip, kúmis júldeni qanjyǵasyna baılapty. Al 97616 áskerı bóliminiń batareıa serjanty, aǵa serjant Orynbek Sándibekov «Dostastyq jaýyngeri» baıqaýynyń bas nomınasııasy boıynsha eki dúrkin chempıony atandy.
Áskerı halyqaralyq oıyndar aldaǵy ýaqytta da jalǵasyn tabady. Spıkerlerdiń aıtýynsha, Qazaqstan aıtýly básekeniń birneshe kezeńin ótkizýge ázir.
Abaı ASANKELDIULY, «Egemen Qazaqstan»