Qyrkúıektiń segizi kúni Astanadaǵy «Barys Arena» sport saraıynda EKSPO-2017 halyqaralyq mamandandyrylǵan kórmesi aıasynda qazaq kúresinen «Álem barysy» absolıýtti álem chempıonaty ótedi. Jarysqa elý eldiń balýany qatysady dep josparlanǵan. Álemdik dodaǵa sheteldik sportshylardan bólek, Qazaqstannyń eń myqty degen tórt balýany synǵa túsedi.
Qazirgi tańda qazaq kúresinen Qazaqstan Ulttyq quramasy elordada sońǵy oqý-jattyǵý jıynyn ótkizýde. Jıyn qorytyndysy boıynsha «Álem barysynda» el namysyn qorǵaıtyn balýandardyń esimi belgili bolmaq. Jattyǵý jıynynda «Qazaqstan barysy» týrnıriniń jeńimpazdary men qatysýshylary Aıbek Nuǵymarov, Muhıt Tursynov, Aıbat Seıten, Ádiljan Ystybaev jáne taǵy basqa esimderi belgili balýandar bar. Ulttyq quramanyń balýandary bıyl jańadan taǵaıyndalǵan bas jattyqtyrýshy Erlan Estektiń qaramaǵynda jattyǵýda. Al buǵan deıingi týrnırlerge balýandardy Jeńis Bıtkózov jattyqtyrǵan bolatyn. Aıta keteıik, Erlan Estektiń ózi kezinde ulttyq qurama sapynda «Qazaqstan barysy», «Eýrazııa barysy» syndy iri dodalarda beldesken balýan.
balýandardyń jattyǵýyna qatysyp, bas bapker jáne sportshylarmen az-kem tildesýdiń sáti tústi. Bas jattyqtyrýshynyń aıtýynsha, ulttyq quramadaǵy alǵashqy oqý-jattyǵý jıyny joǵary deńgeıde ótip jatyr eken. Balýandardyń jattyǵýyna azdap ózgeris engizilgen. «Aldaǵy «Álem barysy» týrnırine 22 tamyzdan bastap kúnine eki mezgil jattyǵý jasap jatyrmyz. Quramaǵa kelgenime eki aı boldy. Balýandar qazir burynǵy bapkerlerimizdiń ádisi boıynsha daıyndalýda. Degenmen, ózim de bir-eki jańa ádis qostym», deıdi bas bapker.
«Álem barysyna» qatysatyn balýandardyń tizimi naqty shyqpaǵanymen, Erlan Estek 2013 jyly «Qazaqstan barysy» atanǵan Aıbek Nuǵymarov naǵyz babynda ekenin aıtty, jattyǵý kezinde jaraqat alyp qalmasa, aldaǵy dúbirli dodada el namysyn qorǵaıdy dep otyr. «Qazirgi ýaqytta Aıbektiń baby kelisip tur. Jattyǵýda ózin áli de tyń ekenin, básekege daıyn ekenin dáleldeýde. Al taǵy bir úmit artyp otyrǵan balýanymyz Muhıt Tursynovtyń baby onsha kelispeı tur. О́ıtkeni, ol «Qazaqstan barysynan» keıin belin jaraqattap alǵan bolatyn. Degenmen, áli alda ýaqyt bar. «Álem barysyna» deıin Muhıt babyna tolyq enip qalar», dedi ol.
Muhıt Tursynovtyń ózi bolsa, qyrkúıek aıynda ótetin dodaǵa tolyqtaı daıyn ekenin, el abyroıyn asqaqtatýǵa bar kúshin salatynyn jetkizdi. «Kúnine jatpaı-turmaı eki mezgil jattyǵamyz. Eger, bapkerler quramy meni tańdap, maǵan «Álem barysynda» beldesesiń dese, el namysyn qorǵaýǵa árqashan daıynmyn», deıdi ol senimdi túrde.
Al Aıbek Nuǵymarov bıyl jańa bas bapkerdiń qaramaǵyndaǵy jattyǵýdyń erekshe ótýde ekenin aıtady. Sondaı-aq, bıylǵy oqý-jattyǵý jıynyna tuńǵysh ret 30-ǵa jýyq balýannyń qatysyp jatqanyn tilge tıek etti. «Jattyǵý kezinde balýandardyń kóp bolǵany óte paıdaly. Bir salmaqta on balýan bolsa, bir-birimizben kúresip, túrli jattyǵýlardy jabyla isteımiz. Erlan Estek jas maman bolǵan soń, jattyǵýy da erekshe. Buıyrsa, bıylǵy «Álem barysynda» top jarýǵa tolyq múmkindigimiz bar», deıdi 2013 jylǵy «Qazaqstan barysynyń» jeńimpazy.
Aıta keteıik, bıylǵy «Álem barysy» ekinshi ret uıymdastyrylady. Tuńǵysh ret týrnır 2014 jyly Pavlodar qalasynda ótken bolatyn.
Álı BITО́RE, «Egemen Qazaqstan»