EKSPO-2017 kórmesinde eń úzdik eriktilerge qurmet kórsetildi, dep habarlaıdy «Astana EKSPO-2017» kompanııasynyń baspasóz qyzmeti.
Aıtýly keshte júzden astam belsendi volonterlar ártúrli sanattar boıynsha marapattaldy. Olarǵa «Astana EKSPO-2017» UQ» AQ Basqarma tóraǵasy Ahmetjan Esimov jáne Bilim jáne ǵylym mınıstri Erlan Saǵadıev sertıfıkattar men estelik syılyqtar tabys etti. О́z sózinde Ahmetjan Esimov EKSPO-2017 eriktileriniń óz mindetterin joǵary deńgeıde oryndaǵanyn atap ótti.
«Volonterlik qyzmet kórmeni tabysty ótkizýdiń mańyzdy faktoryna aınaldy. EKSPO-2017 aıasynda 8,5 myń adam iriktelip alyndy. Onyń 5,5 myńy kórme aýmaǵynda jumys isteý múmkindigine ıe boldy. Olardyń 2500-den astamy - Astana qalasynan, 900 - Almatydan jáne 1600 volonter - ózge aımaqtardan jınaldy. Sondaı-aq, Reseı, Qytaı, AQSh, Belgııa, Italııa, Polsha, Mońǵolııa, Qyrǵyzstan jáne ózge memleketterden kelgen 150 sheteldik volonter kórmege óz úlesterin qosty. Eriktilerdiń ortasha jasy - 19, al eń úlken volonterdiń jasy 70-te. Dál osyndaı 30 «altyn eriktiler» jumys istedi. Kórmedegi jumystary barysynda kóńilderi jarasqan 3 jup shańyraq kóterdi», - dedi Ahmetjan Esimov.
Marapattaý rásimi Álı Oqapov, Almas Kishkenbaev syndy estrada juldyzdary men volonterlardyń konserttik baǵdarlamasyna ulasty. Jaz boıy Qazaqstannyń 16 oblysynan jáne álemniń 35 elinen kelgen volonterlar kúnine 8 saǵattan úsh aýysymmen kórme qonaqtaryna qyzmet etti.