Bireýdiń qorasyna túsip, aq adal malyn urlap ketkender «saqpyn, osynymdy eshkim bilmeıdi» dep oılaıtyn bolýy kerek. Áıtpese, bir túsken úıine ekinshi márte keler me?!
Saıram aýdandyq Ishki ister bóliminiń kezekshisine qońyraý shalǵan Qutarys aýylynyń turǵyny qoradaǵy úsh jylqysynyń urlanǵanyn aıtady. Jedel izdestirý nátıjesinde kúdikti eki azamat ustalǵan. Ábden dánikken urylar saqtyqty umytsa kerek. Sol aýyldyń júk mashınasy bar turǵynyna úsh jylqyny ózderiniń turaǵyna aparyp berýin ótinedi. Olardyń is-áreketterinen sezik alǵan álgi azamat polısııaǵa habarlasady.
Maqtaaral jáne Otyrar aýdanynyń týmasy, órimdeı eki jigit qylmys ústinde ustalǵan. Olardan úsh jylqy qaıtarylyp, zańdy ıesine berilgen. Kúdikti azamattar bireýdiń múlkin ıemdenýdi ar kórmeıdi eken. Úsh jylqysyn aldyrǵan azamat tamyz aıynda jıyrma shaqty úndiginen aıyrylyp, oıbaılap qalǵan. Zaty qus qoı dep onshalyqty indetpese kerek. Úı ıesiniń qatty izdeý salmaǵanyna dánikken ekeý endi jylqylardy aıdap ketemin dep júrip qolǵa túsken.
Bir úıge eki márte túsken urylar quny 2 mıllıon teńge shyǵyn keltirgen. Qazyǵurt aýdanynda da 15 maldy urlaǵan toptasqan baýkespeler qolǵa tústi.
Olar qamaýǵa alyndy. Atalǵan faktiler boıynsha Qylmystyq Kodeksiniń 188-shi «Urlyq» baby boıynsha is qozǵaldy. Qazir sotqa deıingi tergeý amaldary júrgizilip jatyr.
Baqtııar TAIJAN, «Egemen Qazaqstan»
Ońtústik Qazaqstan oblysy