Elshiliktiń jedel jelisine Irma daýylynyń saldarynan ondaǵan QR azamatynan qońyraýlar kelip túsken. Olar ózderi týraly jáne turǵan jeri, sondaı-aq zardap shekken qazaqstandyqtarǵa kómektesý usynysymen baılanys aqparatyn qaldyrǵan.
Bul jaıly «QazAqparat» HAA-ǵa Qazaqstan Respýblıkasy Syrtqy ister mınıstrligi baspasóz qyzmetiniń basshysy habar berdi. Qazaqstannyń AQSh-taǵy elshiligi Florıda shtatynda turatyn qazaqstandyq dıaspora ókilderimen úzbeı baılanys jasap otyr.
Qazaqstan azamattary qajetti keńester men shtattyń shuǵyl qyzmetteriniń nómirlerin alýyna bolatyn qaýyrt jeli ashylǵan. Budan bólek, áleýmettik jelilerdegi qazaqstandyqtardyń basyn qosatyn arnaıy toptarda amerıkalyq jedel járdem qyzmetteriniń nómirleri kórsetilgen aqparattar taralýda.
Maıamıde jáne oǵan jaqyn aýdandarda turatyn kóptegen qazaqstandyqtar ózderi turǵan jerden ketip, basqa shtattardaǵy týystary men dostaryna baryp panalaýda. Tabıǵat apatynyń qaýipti aımaǵynan ketýge úlgermegen, sondaı-aq shtatta qalýǵa táýekel etken azamattar daýyldyń basylýyn arnaıy uıymdastyrylǵan baspanalarda nemese berik salynǵan ǵımarattarda kútedi.