QR Ulttyq Olımpıada komıteti Qaraǵandy, Kókshetaý, Oral qalalaryna arnaıy street workout sporttyq alańdaryn syıǵa tartty. Bul ıgi bastama Ulttyq Olımpıada komıtetiniń prezıdenti Tımýr Qulybaevtyń tikeleı muryndyq bolýymen júzege asyrylýda jáne halyqty buqaralyq sportqa baýlýdy kózdeıdi, dep habarlaıdy Baq.kz aqparat agenttigi.
Osylaısha Tımýr Qulybaevtyń jeke qarajatynan elimiz boıynsha qyryq sporttyq alańnyń qurylysy qarjylandyryldy. Street Workout arnaıy sporttyq alańdary Astana, Almaty, Aqtóbe, Aqtaý, Jańaózen, Shymkent, Qyzylorda, Taraz qalalarynda sport súıer qaýymǵa qoljetimdi bolyp otyr. Aldaǵy ýaqytta bul qalalar tizimi taǵy tolyǵady. Sporttyq alańdar jıyrma túrli snarıadtarmen jabdyqtalǵan jáne adamǵa barlyq bulshyq etin shyńdaýǵa múmkindik beredi.
Sporttyq alańdar, eń áýeli, qalalardyń halyq tyǵyz ornalasqan jáne neǵurlym qoljetimdi aýdandarynda salyndy. Basty maqsat – alańdarda sportpen shuǵyldanýǵa meılinshe kóp adam tartý. Máselen, Oral qalasynda workout alańy turǵyndardyń eń súıikti demalys ornyna arnalǵan jergilikti «Arbatta» salynsa, Qaraǵandyda Ońtústik-Shyǵys yqsham aýdanynda, Kókshetaýda qalanyń ortalyq kóshelieriniń birinde boı kóterdi.
Sport alańdarynyń ashylý saltanatyna Workout Federasııasy ókilderimen qatar qala basshylyǵy, sporttyq jáne jastar uıymdarynyń ókilderi qatysyp, osyndaı alańdar salyp bergen QR Ulttyq Olımpıada komıteti basshylyǵyna alǵysyn bildirip jatty.
Street Workout – eń qoljetimdi sport túrleriniń biri. Qazirgi kezde elimizde osy sport túrimen aınalysatyndar sany artyp keledi. Byltyrǵy jylmen salystyrǵanda olardyń sany 45%-ǵa ósip, júz myńnan astam adamdy quraǵan.