Memleket basshysy Nursultan Nazarbaev Islam Yntymaqtastyǵy Uıymynyń Ǵylym jáne tehnologııalar jónindegi sammıti barysynda Indonezııa Respýblıkasynyń vıse-prezıdenti Iýsýf Kallamen kezdesti.
Áńgime barysynda Qazaqstan Prezıdenti Indonezııa vıse-prezıdentine sammıtke qatysqany úshin rızashylyq bildirdi.
– Bárimiz úshin bul sammıttiń mańyzy zor. Indonezııa Qazaqstannyń mańyzdy seriktesi bolǵandyqtan, sizdermen odan ári tyǵyz yntymaqtastyq ornatýǵa nıettimiz. Elderimiz arasynda naqty ýaǵdalastyqtar bar jáne osy baǵytta maqsatty túrde jumys júrgizý qajet, – dedi Nursultan Nazarbaev.
Indonezııa vıse-prezıdenti Qazaqstan Prezıdentine jumys kestesiniń tyǵyzdyǵyna qaramastan, kezdesýge múmkindik týǵyzǵany úshin alǵys aıtty.
– Bizde ekonomıkanyń túrli salasynda ózara is-qımyl jasaý úshin zor áleýet bar. Búgingi is-shara keleshekte jemisti yntymaqtastyqty jalǵastyrýǵa tyń serpin beretin bolady, – dedi Iý.Kalla.