Qorshaǵan ortany qorǵaý, balyqtar men janýarlar álemin aıalap, sý túbiniń tazalyǵyn saqtaý sekildi sharalardy «Eýrazııalyq energetıkalyq korporasııa» AQ Aqsý elektr stansasy ekolog mamandary jyl saıyn ótkizip keledi.
Jalpy, ózenge jiberiletin tuqy balyǵynyń shabaqtary Qaraǵandy oblysynyń arnaıy balyq sharýashylyǵy kásipornynda ósirilipti. Árbir shabaqtyń salmaǵy 20-30 gramm shamasynda. Ertis ózeni boıynda ornalasqan basqa kásiporyndar da shabaqtardy sýǵa jiberedi. Korporasııa ekologtary «Qazhrom» TUK» fılıaly – Aqsý ferroqorytpa zaýytyndaǵy áriptesterimen birge ózenge 15 000 shamasynda bir jasar balyq tuqymdaryn jibergen bolatyn. Al stansa janyndaǵy balyq sharýashylyǵynyń basshysy Sergeı Kıreevtiń aıtýynsha, sýǵa jiberilgen shabaqtar endi tórt jylda tolyq jetilip, ýyldyryǵyn sý túbindegi shópke shashady da, ózendegi tuqy balyqtarynyń sany kóbeıedi. Sońǵy eki jylda ózende shortan jáne tuqy balyqtary artqan kórinedi. Tuqy balyqtary Ertis ózeninde ómir súrýge beıimdelgen. Stansa mamandary jergilikti balyq ınspeksııasymen birlese ózen tazalyǵyn saqtap, balyǵyn kóbeıtip, qorǵaý maqsatynda jumys jasaýda. Osy kúnge deıin ózenge 160 myńnan astam tuqy balyǵy jiberilipti. Bul maqsatqa 6 mıllıon teńgege jýyq qarajat bólingen. Energetıkter ózderi de balyq sharýashylyǵyn ashyp, onda tuqy shabaqtary men balyqtar ósiredi de, Ertis ózenine jiberedi.
Atalǵan kásiporyn óndiristi jańǵyrtý baǵytyndaǵy negizgi jumystardan bólek, Ertis ózeni men Jasybaı kóliniń jaıylmasynda senbilikter ótkizý, ózenniń jaǵalaýlaryn keńeıtý, arnasyn tazalaý, ekologııalyq aılyqtar, aǵash egý men kógaldandyrý sharalaryn qamtıtyn aýqymdy qorshaǵan ortany qorǵaý sharalaryn turaqty iske asyryp keledi.
Farıda BYQAI, «Egemen Qazaqstan»
Pavlodar oblysy