Úkimettiń búgingi otyrysynda Bilim jáne ǵylym mınıstri Erlan Saǵadıev qazirgi bilim berýdiń negizgi eki trendin atady, dep xabarlaıdy QazAqparat.
«Birinshi trend burynnan beri bar. Máselen, men Astanada otyryp, Qostanaıdaǵy balalarǵa dáris oqımyn. Al ekinshi trend qazir keńinen tarala bastady. Oǵan sáıkes, men beınedáristi jazyp alamyn da, mýltımedııalyq materıaldarmen tolyqtyramyn. Ishine grafıkany salamyn, árbir 5-10 mınýt saıyn suraqtardy kirgizemin. Sóıtip, sapaly bir sabaqty jasap shyǵaramyn. Ony úzdiksiz paıdalanýǵa bolady. Sondyqtan búginde dál osy ekinshi trend birinshini basyp ozyp, alǵa shyǵyp keledi», - deıdi Saǵadıev.
Mınıstrdiń aıtýynsha, qazirgi kezde mektepterge arnalǵan beınefılmder men ınteraktıvti sabaqtardy daıarlaý jumysy aıaqtalýǵa jaqyn. Al joǵary oqý oryndary úshin áli de biraz sharalardy atqarý qajet.
«Shyny kerek, joǵary oqý oryndaryna arnalǵan beınesabaqtardy daıarlaý jumysy endi bastalyp jatyr. Bizge sapaly kontent jasaý qajet. Memlekettik qyzmet salasyndaǵy muǵalimderge de beınekontentti daıarlaıtyn bolamyz», - dep atap kórsetti Erlan Kenjeǵalıuly.
Búginde mektep muǵalimderi úshin 80 myń beınefılmder men ınteraktıvti sabaqtar bar. Olar kez kelgen materıaldy ǵalamtordan, ıa bolmasa, mektep serverinen alyp, sabaq kezinde paıdalana alady.