«OŃTÚSTIK» Aımaqtyq ınvestısııalyq ortalyǵy oblys kásipkerlerine jylyna 7-8 paıyzdyq mólsherlememen jeńildetilgen nesıe berý arqyly olarǵa qoldaý kórsetip keledi. Bul týraly búgin OQO О́ńirlik kommýnıkasııalar qyzmetinde ótken baspasóz konferensııasynda «Ońtústik» aımaqtyq ınvestısııalyq ortalyǵynyń Basqarma tóraǵasy Qýanysh Baıtóre aıtty.
Onyń aıtýynsha, qarjy ortalyǵynda kásipkerler úshin birqatar jeńildikter qarastyrylǵan. Iаǵnı, kepildikke aýyldyq jerdegi múlik alynady, bastapqy start-ap jobalar qarastyrylady. Tıimdi óteý kestesi jasalynady. Eń mańyzdysy nesıeni rásimdeý barysynda eshqandaı komıssııalar alynbaıdy.
«OŃTÚSTIK» Aımaqtyq ınvestısııalyq ortalyǵy 8 jyldyq qyzmeti aıasynda óziniń ekonomıkalyq mańyzy jaǵynan joǵary kórsetkishterimen erekshelenip keledi. Atap kórsetsek, 2009 – 2017 jyldar aralyǵynda oblysymyzdyń 16 431 turǵyny jeńildetilgen nesıe jáne lızıngke qol jetkizip, kásipkerlikpen aınalysýda, sondaı-aq, ózimen qosa birneshe azamattardy da jumyspen qamtyǵan. Qarjylandyrylǵan jobalar nátıjesinde jumyspen qamtylǵandar sany 41 181 adamǵa jetip otyr. Jalpy qarjylandyrylǵan 16 myńnan astam jobany júzege asyrýǵa 49 774,4 mln. teńge baǵyttaldy. Nesıelendirilgen jobalar aıasynda oblystyq bıýdjetke jalpy somasy 893,4 mln. teńge kóleminde salyq tólendi», - dedi Basqarma tóraǵasy.