Mańǵystaý oblysynyń ákimi Eraly Toǵjanov bokstan álem jáne olımpıada chempıondarymen kezdesti. Basqosýǵa oblysymyzdyń sport ardagerleri men osy salada eńbek etip júrgen qyzmetkerler jáne úzdik sportshylar, sondaı-aq, basqarma basshylary, BAQ ókilderi qatysty, dep habarlaıdy egemen.kz tilshisine Mańǵystaý oblysy ákiminiń baspasóz qyzmeti.
-Sizder álemdik sport arenasynda elimizdiń bedelin arttyrýda úlken úles qosyp jatyrsyzdar. N.Á.Nazarbaev halyqtyń densaýlyǵynyń kepili buqaralyq sportty damytýǵa basa mán beredi. Buqaralyq sport - ult saýlyǵynyń kepili. Sondyqtan, sizderdiń kórsetken jetistikterińiz ósip kele jatqan jetkinshekter úshin aıqyn mysal. Bıik belesterdi baǵyndyryp, el atyn shyǵarý jolynda aıanbaı eńbek ete berýlerińizge tilektespin, - dedi oblys ákimi E.Toǵjanov.
Jıynǵa Serik Ábdinalıev, Ermahan Ybraıymov, Baqtııar Artaev, Qanat Islam, Ádilbek Nııazymbetov, Berik Ábdirahmanov, Erdos Jańabergenov, Lebzıak Aleksandr, Rýstam Saıdov sııaqty sport sheberleri qatysyp, oblys ákimine jastarǵa mol múmkindik jasap otyrǵany úshin alǵys aıtyp, óńir basshysy Eraly Toǵjanovqa bylǵary qolǵap syılady.
Búgin Aqtaýda Elbasynyń «Rýhanı jańǵyrý» baǵdarlamasy aıasynda bokstan Shoqyr Bóltekuly atyndaǵy H halyqaralyq týrnıriniń saltanatty ashylýy bolady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy