Qazaqstan ulttyq quramasynyń bas jattyqtyrýshysy Aleksandr Borodıýk 2018 jylǵy álem chempıonatyna irikteý kezeńi aıasyndaǵy Rýmynııa-Qazaqstan matchy aldynda jýrnalsterdiń suraqtaryna jaýap berdi.
– Erteńgi oıynnan ne kútesiz? Fýtbolshylaryńyz matchqa qanshalyqty daıyn?
– Menińshe, erteń jaqsy oıyn bolady. Qazaqstan men Rýmnııa quramalarynyń jankúıerleri úshin tartysty match bolmaq. Árıne, maqsatymyz – jeńiske jetý. Shákirtterim oıynǵa saqadaı saı desem de bolady.
– Rýmynııa jáne Armenııa quramalaryna qarsy oıyn aldynda birqatar oıynshymyzdy joǵalttyq. Bul aldaǵy oıynǵa keri áserin tıgizbeı me?
– Match aldynda negizgi quramnyń oıynshylary jaraqat alyp qalǵany oıyn taktıkasyna óz áserin tıgizbeı qoımaıdy. Fýtbolda almastyrylmaıtyn adam bolmaıdy degen sóz bar ǵoı. Ulttyq quramanyń basqa da oıynshylaryna múmkindik berip kóremiz. Shákirtterim erteńgi oıynnyń mańyzdy ekenin, barlyq kúshti salyp oınaý kerektigin jaqsy túsinedi.
– Bir suhbatyńyzda Rýmynııaǵa qarsy daıyndyqqa ýaqyttaryńyz az bolǵanyn aıtyp edińiz. Erteńgi oıynǵa qandaı tosyn syı daıyndadyńyz?
– Erteń biz ótken oıyndarǵa qaraǵanda taktıkamyzdy azdap ózgertemiz. Pozısııalarda ózgeris bolady. Alańǵa shyǵatyn oıynshylardy da shamamen anyqtap qoıdyq.
– Rýmynııa quramasyn qanshalyqty zerttep úlgerdińiz?
– 2-3 kúnniń úshinde Rýmyn quramasynyń oıyndaryn, jekelegen oıynshylardyń múmkindikterin qarap, saralap kórdik. Jattyǵý kezinde teorııalyq sabaq kóbirek kóńil bóldik. Degenmen, Rýmynııa quramasyna jańa bapker, jańa oıynshylar kelgenin atap ótken jón. Olar da aldaǵy oıynǵa tosyn syı daıyndaǵany belgili. Erteńgi match eki qurama úshin óte mańyzdy.
– Bizdiń toptan qaı qurama 2018 jylǵy álem chempıonatyna barýy múmkin?
– Meniń boljamym boıynsha, Danııa, Polsha jáne Chernogorııa quramalarynyń biri shyǵýy múmkin. Úsheýi de bir-birine laıyqty qarsylastar.
Álı BITО́RE,
«Egemen Qazaqstan» –
Býharestten
Sýret avtory – Ilııas Omarov