Elordada qart adamdarǵa arnalǵan taǵy da bir shaǵyn ortalyq paıda boldy. Atap aıtqanda Esil aýdanynda qarııalardyń bos ýaqytyn ótkizýge arnalǵan «Dana» atty shaǵyn ortalyq ashyldy,-dep habarlaıdy elorda ákimdiginiń resmı saıty.
Qabanbaı batyr 40, mekenjaıy boıynsha ornalasqan «Infınıtı-1» turǵyn úı kesheninde ashylǵan eki bólmeli shaǵyn ortalyq, qajetti jıhazben qamtamasyz etilgen. Munda zeınetkerlerdi túrli maman ıeleri jeke suraqtary boıynsha qabyldap, alýan taqyryptar talqylanatyn dóńgelek ústelder men semınarlar ótkiziletin bolady. Ortalyqta qarııalar bos ýaqytyn ótkizip, ústel oıyndaryn oınap, merzimdi baspasóz quraldaryndaǵy jańalyqtarmen tanysa alady.
Esil aýdany ardagerler keńesiniń tóraıymy Rysty Atyǵaevanyń aıtýyna qaraǵanda, atalmysh shaǵyn ortalyq Halyqaralyq qarttar kúnine oraı ashylyp otyr. Al, qazan aıynyń sońyna deıin Esil aýdanynda qarııalarǵa arnalǵan taǵy da tórt shaǵyn ortalyq ashylmaq.
«Dana» shaǵyn ortalyǵyn ashýǵa «Esil grýpp servıs» JShS qoldaý kórsetti. Bul bizdiń aýdandaǵy osyndaı tórtinshi ǵımarat. Budan buryn «Esil» aýdany ákiminiń apparaty Ardagerler keńesimen birlese otyryp, «Nursaıa-1», «Ýıýt», «Nomad» turǵyn úı keshenderinde qarııalarǵa arnalǵan shaǵyn ortalyqtardy ashqan bolatyn. Osy aıdyń sońyna deıin qarttar úshin taǵy da tórt ortalyqty ashamyz dep josparlap otyrmyz. Osylaısha bizdiń aýdanda qarııalarǵa arnalǵan 8 shaǵyn ortalyq jumys isteıtin bolady», — dedi Rysty Atyǵaeva.
Ǵımarattyń ashylý sharasyna qatysqan qalalyq ardagerler keńesiniń tóraǵasy Sansyzbaı Esilov ortalyqtyń qyzmetkerlerine sáttilik tilep, «Ardagerler uıymynyń» atynan kishigirim syılyqtaryn tabys etken bolatyn.
Shaǵyn ortalyqtyń esigi ár azamat úshin ashyq. Munda, sondaı-aq, «Infınıtı» turǵyn úı kesheniniń mereıtoı ıelerin quttyqtaý, Otan soǵysyna qatysqan ardagerlerdi, tyl eńbekkerlerin marapattaý sebebimen de azamattar jınalatyn bolady. Ortalyqta qyzmet etetin «Esil» aýdanynyń ardagerler keńesiniń músheleri kópbalaly analarǵa, áleýmettik jaǵdaıy nashar otbasylarǵa, mektep oqýshylaryna qol ushyn sozýǵa qashanda daıyn ekenderin aıtty.