20 qazan kúni horegrafııalyq jaýhar týyndy – P.I. Chaıkovskııdiń «Uıqydaǵy arý» baletimen «Astana Operanyń» V mereıtoılyq teatr maýsymynyń shymyldyǵy túriledi. Teatr jańa shyǵarmashylyq jyly kórermen qaýymǵa birqatar opera jáne balet tusaýkeserlerin usynbaq.
«Mereıtoılyq maýsymdy qazirgi zamannyń aty ańyzǵa aınalǵan horeografy Iý.N. Grıgorovıchtyń qoıylymyndaǵy «Uıqydaǵy arý» baletimen ashýdy jón kórdik. Bul metrdiń bizdiń sahnamyzda qoıǵan alǵashqy spektakli bolatyn, kórermen shynaıy týyndynyń jańa redaksııasyn birden jyly qabyl aldy, sebebi mýzyka men horeografııa keremet úılesim tapqan edi. 17 jáne 18 qarasha kúnderi J.Bızeniń «Karmen» operasynyń alǵashqy kórsetilimi ótedi», dep bólisti «Astana Opera» teatrynyń dırektory Ǵalym Ahmedıarov.
2018 jyldyń naýryz aıynda ujym jańa redaksııada, ssenografııa men kostıýmderde M.Tólebaevtyń «Birjan-Sara» ulttyq operasynyń tusaýkeserin josparlaýda. Sonymen qatar mereıtoılyq maýsymda A.Adannyń «Korsar», T.Qajyǵalıevtyń «Qozy Kórpesh – Baıan Sulý» baletteriniń, Dj.Pýchchınıdiń «Týrandot», Dj. Rossınıdiń «Sevıldik shashtaraz» operalarynyń tusaýkeserleri kútilýde.
Qazirgi tańda teatrda súıikti kórermenmen qaıta qaýyshýdyń keremet atmosferasy sharyqtaýda. Daıyndyq zaldary balet spektakline qyzý ázirlenip jatqan ártisterge lyq toly. «Astana Opera» sahnasyndaǵy «Uıqydaǵy arý» qoıylymyn ataqty baletmeıster Iýrıı Grıgorovıch ózge baletmeısterler usynǵan balalar ertegisi ne bolmasa oıyn-saýyq kórinisi retinde emes, Chaıkovskııdiń mýzykasyna sáıkes keletin rýhty poema retinde kórsetpek. 20 jáne 22 qazan kúni basty partııalarda jetekshi solıster men talantty ártister óner kórsetedi. Názik Avrora rólin Mádına Basbaeva men Áıgerim Beketaeva usynsa, Dezıre hanzada partııasynda Erkin Rahmatollaev, Taır Gataýov kórermen aldyna shyqpaq. Balettiń keremet mýzykalyq beınesi Jaqsylyq pen Jamandyqtyń qarama-qarsylyǵy sanalatyn eki áýen – Mamyrgúl Perisi (Ásel Shaıkenova, Ánel Rústemova) men Karabos Perisi (Ildar Shakırzıanov) arasyndaǵy taqyryptardan órbıdi.