Túrkııada jalaýy jelbiregen dástúrli «Túrkııa týry-2017» velojarysynyń ekinshi kezeńinde «Astana» komandasynyń veloshabandozy Rıkkardo Mınalı úzdik úshtiktiń qatarynan kórindi.
Velokópkúndiktiń ekinshi kúni sportshylar Kýmlýdja-Fethıe aralyǵyndaǵy 206 shaqyrym tasjolmen júrip ótti. Kýmlýdja qalasynan shyqqan sportshylar toby márege taıaǵanǵa deıin top bolyp keldi. Al sońǵy 20 shaqyrymda velosportshylar jeke-dara kósh bastaýǵa tyrysyp, álsin-álsin shabýylǵa shyqqan bolatyn. Biraq umtylystary sátti bola qoımady. 206 shaqyrymdy eki saǵat, eki mınýt, bes sekýndta júrip ótken «Bora Hengsgroh» komandasynyń ókili Sem Bennet ekinshi kezeńde de top jardy. Máre syzyǵyn ekinshi bolyp «Trek-Segfredo» veloshabandozy Edvard Tens kesti. Al «Astana» veloklýbynyń ókili Rıkkardo Mınalı úzdik úshtikti qorytyndylady. Bir aıta keterligi, úsh veloshabandozdyń da ekinshi kezeńde márege kelgen ýaqyt kórsetkishi birdeı boldy.
«Túrkııa týryna» qatysyp jatqan «Astana» komandasy ekinshi kezeńnen keıin jeti veloshabandozben qaldy. Keshegi jarys kúninde Sergeı Cherneskıı aýyr jaraqat alyp, kezeń sońyna deıin jete almady. Al buǵan deıin úlken qaqtyǵys ortasynda qalyp qoıǵan Iesper Hansen jaraqattan aman shyǵyp, sáttilik joldas bolǵanyn aıtady. «Keshe aýyr jaraqat alyp qalatyndaı jaǵdaı boldy. Birneshe shabandoz úlken jyldamdyqta kele jatyp, bir-birimizge soqtyǵystyq. Mundaı oqıǵadan jaraqatsyz shyǵý múmkin emes edi. Alaıda meniń jolym boldy. Endi bar kúshimdi komandanyń jeńisi úshin salatyn bolamyn», deıdi Hansen.
Ermuhamed MÁÝLEN,
«Egemen Qazaqstan»