Premer-Mınıstr Baqytjan Saǵyntaevtyń tóraǵalyǵymen ótken QR Úkimetiniń otyrysynda bilim berý men ǵylymdy damytýdyń 2016-2019 jyldarǵa arnalǵan memlekettik baǵdarlamasynyń iske asyrylý barysy týraly bilim jáne ǵylym mınıstri Erlan Saǵadıev baıandady.
Mınıstrdiń aıtýynsha, 2017 jyly bilim berý men ǵylymdy damytýdyń 2016–2019 jyldarǵa arnalǵan memlekettik baǵdarlamasynyń 8 ındıkatoryn, 51 kórsetkishin, 168 sharasyn oryndaý josparlanǵanyn aıtyp berdi.
2017 jyly barlyǵy iske asyrýǵa 418 562,9 mln teńge bólingen. BǴDMB iske asyryp bastaǵan ýaqyttan beri 1 309 mektepke deıingi mekeme ashylyp, 155 mektep salyndy.
Mektepke deıingi uıymdardyń arnaıy bilimi bar pedqyzmetkerleriniń sapaly quramy 1 500 pedagogqa artty. Joǵary jáne birinshi sanatty pedqyzmetkerlerdiń sany 145 myń adamdy quraıdy.
Mektepke deıingi jáne mektepte bili berý mazmuny EYDU standarttaryna sáıkes jańartyldy, kolledjder men JOO-larda halyqaralyq sarapshylar men jumys berýshilerdiń qatysýymen ázirlengen 92 jańa baǵdarlama engizilýde.
Balalardy balabaqshaǵa bólý prosesi pılottyq rejımde avtomattandyrylyp jatyr. 2018 jyly júıeni tutastaı engizý kózdelip otyr. Balabaqsha ashý rásim jeńildetý maqsatynda jańa sanıtarlyq normalar men erejeler qabyldandy.
Jyl sońyna deıin úsh aýysymdy jáne apatty mektepterdiń ornyna 76 mektepti paıdalanýǵa berý josparda bar. 1 qyrkúıekte 52 mektep paıdalanýǵa berildi.
318 kolledjde «Barshaǵa arnalǵan tegin kásiptik-tehnıkalyq bilim berý» jobasy iske asyrylyp jatyr. 421 kolledjde 80 mamandyqtyń 160 biliktiligi boıynsha 27 193 stýdent qamtý arqyly, 2 433 kásiporynnyń qatysýymen qosarly bilim berý júıesi engizilýde.
JOO-larda baqylaý keńesteri arqyly rektordy tańdaý tetigi engizilgen, korporatıvtik hatshylar men ishki aýdıt qyzmetteri qurylýda. Qazaqstannyń segiz JOO-sy 2017 jyly QS WUR álemniń úzdik ýnıversıtetteriniń reıtıngisinde atalyp ótken.
«Bıyl qyrkúıek aıynda Islam yntymaqtastyǵy uıymynyń ǵylym jáne tehnologııalar jónindegi birinshi sammıti aıasynda ǵylym, tehnologııalar jáne ınnovasııalar boıynsha IYU 2026 jylǵa deıingi baǵdarlamasy ázirlenip, qabyldandy», — dedi E. Saǵadıev.