Búgin Batys Qazaqstan oblysynyń ákimi Altaı Kólginov oblys aktıvine Qazaqstan Respýblıkasy Prezıdenti Ákimshiliginiń kelisimimen áleýmettik máseleler jónindegi jańa orynbasary - Ospanqulov Ǵabıdolla Abdollaulyn tanystyrdy.
Ǵabıdolla Ospanqulov 36 jasta. 2002 jyly Qazaq gýmanıtarlyq zań ýnıversıtetin, 2007 jyly Qazaqstan-Reseı ýnıversıtetin Astana qalasynda bitirgen. 2015 jyly «Memlekettik basqarý» mamandyǵy boıynsha Bırmıngem ýnıversıtetinde (Ulybrıtanııa) magıstr dárejesin qorǵaǵan.
Jańa orynbasar eńbek jolyn «Evrazııa Konsaltıng» jeke kompanııasynda zańger kómekshisi bolyp bastaǵan. Budan keıin Qazaqstan Respýblıkasy Parlamenti Senaty depýtatynyń kómekshisi; Qazaqstan Respýblıkasy Parlamenti Senatynyń Áleýmettik-mádenı damý komıtetimen baılanystar bóliminiń bas konsýltanty; Qazaqstan Respýblıkasy Prezıdenti Ákimshiligininiń Parlamenttegi Prezıdent ókildiginiń sektor meńgerýshisi; Pavlodar oblysy Ekibastuz qalasy ákiminiń áleýmettik máseleler jónindegi orynbasary; Pavlodar oblysynyń bilim berý salasynda baqylaý departamentiniń dırektory; Qazaqstan Respýblıkasy Bilim jáne ǵylym mınıstrliginiń Ákimshilik jumystar jáne jastar isteri jónindegi departamentiniń dırektory; Qazaqstan Respýblıkasy Bilim jáne ǵylym mınıstrligi Jastar isteri komıtetiniń tóraǵasy laýazymdaryn atqarǵan. Oralǵa kelgenge deıingi sońǵy qyzmeti - Qazaqstan Respýblıkasy Din isteri jáne azamattyq qoǵam mınıstrliginiń Jastar saıasaty departamentiniń dırektory bolyp istegen eken.
«Ortalyqtan – óńirge» rotasııasy boıynsha taǵaıyndalǵan jańa orynbasaryn oblys aktıvine tanystyrǵan Altaı Kólginov Ǵ.Ospanqulovqa jemisti eńbek tiledi.
Qazbek QUTTYMURATULY, «Egemen Qazaqstan»