IýNESKO-nyń Parıj qalasyndaǵy shtab-páterinde «Jahandyq álemdegi qazirgi qazaqstandyq mádenıet» jobasyn tanystyrý aıasynda «Qoǵamdyq sanany jańǵyrtý: Nursultan Nazarbaev modeli» atty halyqaralyq-tájirıbelik konferensııa ótti.
Jıyn sessııalary birneshe negizgi taqyryptar boıynsha bólindi. Qazaqstan Respýblıkasynyń Tuńǵysh Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasyn Qazaqstan Respýblıkasy Prezıdenti Ákimshiliginiń Ishki saıasat bóliminiń meńgerýshisi Aıda Balaeva tanystyrdy.
«Sandy tehnologııalardyń qarqyndy damýy jáne olardyń barlyq derlik salaǵa enýi nátıjesinde áleýmettik-ekonomıkalyq qatynastardyń jańa paradıgmasy týyndady. Mazmundyq jaǵyna ótpes buryn osy bastamaǵa túrtki bolǵan tarıhı logıkasyna toqtalaıyn. Táýelsizdiktiń shırek ǵasyry aralyǵynda bizdiń elimiz naryqtyq ekonomıkaly demokratııalyq memleketke aınalýy jolynda batyl reformalar jasady. О́tpeli kezeńniń qıyndyqtaryn eńsergen Qazaqstan qarqynyn báseńdetken joq.
2012 jyly Prezıdent Nursultan Nazarbaev Qazaqstandy ozyq 30 eldiń qataryna kirgizýdi maqsat etetin damytýdyń 2050 jylǵa deıingi strategııasyn usyndy. Bul maqsatty oryndaýdyń negizgi mehanızmi – adamı kapıtal bolatyn. Álem bir orynda turmaıdy, biz ǵalamat ózgerister kýási boldyq. О́mir salty men oılaý daǵdysyn ózgertýge bolmas, alaıda bilim berý jáne naqty is-áreketter arqyly qalyptastyrýǵa bolady. Elbasymyz muny jalpyulttyq jobalar júıesi arqyly iske asyrýdy usyndy. Bul jobalardyń árqaısysy jańǵyrtý ortasyn qalyptastyryp, qoǵamdy osy ortaǵa tartady. Osy maqsatta 6 jalpyulttyq jobalar usynylǵan bolatyn», degen Aıda Balaeva árbir jobaǵa toqtalyp, olardyń iske asyrylý barysy jaıly tolyqqandy maǵlumat berdi.
«Egemen-aqparat»