Elordadaǵy «Jastar» saraıynda «Biz birgemiz, bir otbasymyz» ataýymen Ýkraın halyq shyǵarmashylyǵynyń III halyqaralyq dástúrli án-bı baıqaýy ótti. «Qazaqstandyq ýkraına Radasy» qoǵamdyq birlestigi uıymdastyrǵan merekelik sharaǵa respýblıkamyzdyń jeti oblysynan úsh júzge jýyq ónerpazdar keldi.
Qazaq-ýkraın baılanysynyń búgingi deńgeıin pash etip, qarym-qatynasyn nyǵaıtýǵa baǵyttalǵan sharaǵa Qazaqstan halqy Assambleıasy atynan saılanǵan Májilis depýtattary men qoǵam qaıratkerleri jáne elimizdegi túrli etnostyq uıymdardyń ókilderi qatysty. Al uıymdastyrýshylardyń aıtýynsha, baıqaý aıasynda Memleket basshysy aıqyndap bergen «Rýhanı jańǵyrý» baǵdarlamasynyń sheńberindegi tapsyrmalardy júzege asyrý maqsaty kózdelgen. О́ıtkeni, onyń astarynda qoǵamdyq kelisim men tatýlyq, birlikti bekemdeý bar ári Qazaqstandaǵy túrli ulttar men ulystar mádenıetiniń jańǵyrýy jatyr. Merekelik jıyndy saltanatty jaǵdaıda ashqan Qazaqstan halqy Assambleıasy Tóraǵasynyń orynbasary Darhan Myńbaı Prezıdent N.Nazarbaevtyń «Rýhanı jańyrý: bolashaqqa baǵdar» maqalasynda «Ulttyq salt-dástúrlerimiz ben tilimiz, mýzykamyz ben ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis» dep naqty atap kórsetilgendigin tilge tıek etti.
«Bul baıqaýdy bizdiń elimizde turyp jatqan ýkraındardyń ulttyq óneri men shyǵarmashylyǵynyń damyp jatqanynyń belgisi dep baǵalaýǵa bolady. Sondaı-aq, olardyń óz tili men tól mádenıetiniń zaman talabyna saı keń óris alyp otyranyn kórsetedi. Sondyqtan da búgingi baıqaýǵa qatysýshylardyń ynta-yqylastary men qyzyǵýshylyqtary zor», dedi D.Myńbaı.
Jalpy, qoǵamdyq sanany jańǵyrtý maqsatynda uıymdastyrylatyn mundaı mádenı sharalar óner men shyǵarmashylyq týyndylary arqyly adamdardyń bir-birin tanyp, bilýinde oń yqpalyn tıgizedi. Sondyqtan da «Jastar» saraıynyń foıesinde Qazaqstan halqy Assambleıasy men ýkraın sheberleriniń qolynan shyqqan qoldanbaly óner týyndylarynyń kórmesi uıymdastyryldy.
Nurlybek DOSYBAI,
«Egemen Qazaqstan»