27 qazan kúni Katalonııa táýelsizdigin jarııalaǵan bolatyn. Biraq arada eki kún ótken soń Ispanııanyń tutastyǵyn qoldaý maqsatynda Barselonada aýqymdy sherý ótti.
«Katalonııanyń táýelsizdigine narazylyǵyn bildirip, halyqtyń manıfestasııaǵa shyqqanyna eshqandaı qarsylyǵymyz joq. Olardyń arasynda áriptesterimiz, dostarymyz, týysqandarymyz bar. Eger de kópshilik arasynda shý shyǵaryp, janjalǵa shaqyrǵan topty kórseńiz, úndemeı ǵana ótip ketińiz», – dedi senbi kúni «Katalonııa ulttyq assambleıasy».
Esterińizge sala keteıik, buǵan deıin Katalonııa Ispanııadan erkindik alý jóninde referendým ótkizip, buny Madrıd tarapy quptamaǵan bolatyn. Ispanııa bıligi konstıtıýsııanyń 155-babyn júzege asyrý týraly sheshim qabyldap, aımaqtyń avtonomııalyǵy toqtatylyp, Katalonııa endigi tikeleı Madrıdke baǵynbaq. Al jeksenbi kúni memlekettiń tutastyǵyn qoldaý maqsatynda kezekti aýqymdy sherý ótti.
8 qazan kúni referendýmnan keıingi alǵash aksııaǵa 300-900 myń adam qatysqandyǵy habarlanǵan. Bul jolǵy sherý de odan kem túspedi.
Naýqan jergilikti ýaqyt boıynsha saǵat 10:00-de Dıagonal jáne Paseo-de-Grasıa kósheleriniń qıylysynan bastaldy. Al ary qaraı sherýshiler Katalonııanyń kóshelerin júrip ótip, ortalyq alańǵa jınaldy. Olardyń qoldarynda Ispanııanyń, Katalonııanyń, EO-nyń týlary boldy.
Bir qyzyǵy, sherýge birde-bir polıseı, tipti gvardııalyqtar da qatyspady. Alaıda sherýdi tártip saqshylary tikushaq arqyly baqylyp otyrdy. Olar tipti, taksıge mingen týrısterdiń kópshilik ortasynda bógelip qalmaýyna múmkindik berdi.
«Men katalonmyn, bul aımaqta týǵaly beri ómir súrip kelemin. Biraq Ispanııadan alshaqtaýymyz bárimizge keri áserin tıgizedi dep esepteımin. Osy arqyly jalpy eýropalyq keńistikten alshaqtap qalamyz. Bul óz kezeginde jastarǵa da zııanyn tıgizedi», – dedi sherýge qatysýshylardyń biri.
Alańǵa shyqqandar «Viva España, viva Cataluña!» dep halyqty birlikke shaqyrýmen boldy. Sondaı-aq, «Puigdemont a prisión» (Qazirgi Katalonııa basshysy Pýchdemondy qamaý kerek) dep aıqaılaǵandar da joq emes edi.
Ispanııa úkimeti Karles Pýchdemondy otstavkaǵa jibergen bolatyn. Biraq ol bul jóninde ázirge pikir bildirmedi.
Madrıd óz kezeginde táýelsizdik jarııalaý týraly sheshimdi qaıta qaraý úshin katalonııalyq separatısterge úsh kún ýaqyt bergen. Búgin sol merzimniń sońǵy kúni. Pýchdemonnyń qyzmetinen bosatylǵanyn aımaqtyq polısııa da moıyndady. Biraq jergilikti bılik mundaı sheshimdi qoldaýǵa asyǵar emes. Al Madrıdtiń basshy etip jibergen Soraııa Saens-de-Santamarııanyń aımaqty qalaı basqaratyny ázirge belgisiz.
Jergilikti aqparat quraldary Pýchdemonnyń úkimetti Jıronaǵa kóshirý jaǵyn qarastyrǵanyn da habarlady.
Barselonanyń qalalyq polısııasy jeksenbi kúngi sherýge 300 myńǵa jýyq adam qatysqanyn málimdedi. Alaıda uıymdastyrýshylar bul kórsetkishtiń bir mıllıonnan asqanyn jetkizdi.
Budan bólek, Ispanııanyń El Pais gazeti de sherýge bir mıllıonnan astam adam shyqqanyn senimdi túrde habarlady. Al Societat Civil Catalana qoǵamdyq uıymy jergilikti polısııanyń aqparatyn «fake news» dep baǵalady.
Aıan ÁBDÝÁLI, «Egemen Qazaqstan»