Otanǵa degen súıispenshilik aldymen týǵan jerge degen súıispenshilikten bastalady. Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynda «Týǵan jer» baǵdarlamasyn júzege asyrýǵa elim degen ár azamat úles qosýy kerektigi aıtylǵan.
Osy oraıda Mańǵystaý oblysynda kóptegen jobalar júzege asyrylýda. Bıýdjetten tys qarjyǵa mektep, balabaqsha, joldar jóndelip, oqý ǵımarattarynyń materıaldyq-tehnıkalyq bazasy jańartylyp, kásipkerler jerlesterine qoldaý kórsetýde, dep habarlady Mańǵystaý oblysy ákimdiginiń baspasóz qyzmeti egemen.kz tilshisine.
Týǵan jerge taǵzym jasaǵandardyń biri - Shetpe aýylynan shyqqan kásipker. Ol jerlesterine tamasha tartý jasap, aýylda zaman talabyna saı sport keshenin salyp berdi. Suńǵat Muńalbaev keshen qurylysyna 200 mln. teńgesin jumsaǵan. Qýanǵan aýyl turǵyndary záýlim sport kesheniniń ashylý saltanatyna taı-tuıaǵy qalmaı túgel jınaldy. Munda bir mezgilde 100 adamǵa deıin jattyǵa alady. Sport kesheninde voleıbol, basketbol men shaǵyn fýtbol zaldarymen qatar talapqa saı jabyq basseın ashyldy. Boks pen kúres úıirmeleri jumys isteı bastady.
«Aýdanymyz sporttan kende emes. Álem chempıondary, Azııa chempıondary qasymyzda júr. Endi, bizdiń bıik shyńymyz, Olımpıada chempıonyn daıyndaý. Negizinen sporttyń shyńyna shyǵatyndardyń kóbi aýyldy jerden shyǵady. Onyń ústine dál mynadaı zamanǵa saı sport keshenininde jattyǵyp, daıyndalatyn bolsa balalarymyzdan da úmitimiz zor», – deıdi QR qurmetti sport qaıratkeri Sabaqbaı Tilegenov.
Aıta keteıik, Mańǵystaý aýdanynda tap osyndaı alty birdeı sport kesheni aýyl kásipkerleriniń qarjylandyrýymen salynyp jatyr. Aýyl azamattary týǵan jerge degen ystyq yqylasyn osylaısha bildirmek nıette, delingen baspasóz habarlamasynda.
Gúlaıym ShYNTEMIRQYZY, «Egemen Qazaqstan»