Myń jasaǵan shahardyń «Arbat» atalatyn kóshesiniń bastaýy jóndeýden ótkeli burynǵydan da qulpyryp sala berdi. Buryn Jibek joly kóshesiniń bul ıirimi sýretshilerdiń býyrqanǵan boıaýlarynyń ádemi órnekterimen ótkinshilerdi ózine shaqyratyn. Endi alańqaıdaǵy shashylyp túsken asyqtar jurtshylyqtyń kóńilin aýdarady.
Úlken kósheniń ortasynda shashylyp túsken asyqtar qazaq halqynyń ulttyq oıynynyń bir túri bolyp sanalady. Ol kúndiz de, túnde de oınalady. Máselen, kúndizgisi mergendikke, túndegisi eptilikke baýlıdy. Iirgende túsken qalpyna qaraı asyq alshy, táıke, búk, shik dep atalady. Al atýǵa arnap jasalǵandary saqa, ońqaı dep bólinedi. Myna asyqtarǵa qarap turyp, balalyq kezeńdegi oıyndar eske túsedi. Onyń myna túrleri oıǵa oralady sonda, qumar, táıke, ompy, alshy, han atý, qaqpaqyl taǵy basqalary bolyp kete beretin...
Oıynǵa 2-4 bala qatysatyn. Árqaısysy jaqsy jonylǵan, tabany qaıralǵan tórt asyǵy bolýy shart. Oıynshylar ózara kelisip, jeńimpazǵa júlde taǵaıyndap alady da, kezekpen tórt asyqty ıiredi. Eger ıirýshi: tórt búk, ne tórt shik, ne tórt alshy, ne tórt táıki túsirse júldeniń jartysyn alady, tórt asyq tórt túrli tússe onda tigilgen júldeni túgeldeı alady. Osylaısha oıyn jalǵasa beredi.
Qyzyq, mynaý shashylyp túsken appaq asyqtardy kórgen balalar tańyrqaı qaraıdy. Olarǵa tańsyq qoı. Myna kúzgi kanıkýl kúnderi ádemi taǵylymdy elestetedi. Kórińiz, eskertkish degen kóp qoı, onyń túri de, mazmuny da san túrli bolyp keledi...
Saparbaı PARMANQUL,
«Egemen Qazaqstan»
ALMATY
Sýretti túsirgen avtor