Osydan tórt jyl buryn Aqmeshitińizde jaqsy bir is qolǵa alyndy. Qalanyń Tıtov jáne Gagarın shaǵyn aýdandaryndaǵy ábden eskirgen, tozyǵy jetken apatty turǵyn úılerdiń ıelerine jańa baspana soǵý jumysy edi ol. Qabyrǵasy qırap, tóbesi opyrylyp, ishindegi adamdardy basyp qalý qaýpi boldy.
Halyq óte qobaljýly-tyn. Osyndaı syn saǵatynda memleket kómekke keldi. 25 apatty úıde turyp jatqan 300-ge jýyq adamǵa arnalyp 6 turǵyn úıdiń qurylysy bastaldy solaı. Jaqynda osy jumystyń nátıjesin kórdi halyq. Apatty úıde turyp jatqan otbasylarǵa jańadan salynǵan 305 páterlik 6 kópqabatty úı paıdalanýǵa berildi. Baspanaly bolǵandardyń ishinde zeınetkerler, jas jáne kóp balaly otbasylar men jumyssyz adamdar da bar.
Oblys ákimi Qyrymbek Kósherbaev páter ıelerine sý jańa baspananyń kiltterin tabystap, turǵyndardy qonys toıymen quttyqtady.
– Biz memlekettik baǵdarlamalar aıasynda salynǵan úılermen qatar, jyl saıyn apatty jaǵdaıdaǵy úılerdiń máselesin de kezeń-kezeńimen sheship kelemiz. Buǵan deıin apatty dep tanylǵan úılerdiń ornyna 204 páterli 4 kóp qabatty turǵyn úı paıdalanýǵa berilgen bolatyn. Búgin osy ıgilikti isterdiń jalǵasy retinde Jappasbaı batyr kóshesi men Tıtov qystaǵyndaǵy jańa shaǵyn aýdanda 305 páterli 6 kóp qabatty turǵyn úıdiń kiltin saltanatty túrde tabystaǵaly turmyz. Nátıjesinde, bıyl qaladaǵy apatty jaǵdaıdaǵy turǵyn úılerdiń máselesi tolyǵymen sheshimin tapty dep aıtýymyzǵa bolady. Osy ıgi isterdiń barlyǵy – Elbasy Nursultan
Nazarbaevtyń syndarly saıasatynyń arqasynda qol jetkizip otyrǵan eń basty jetistigimiz. «О́z úıim – óleń tósegim» dep, basynda jeke baspanasy bolýyn armandamaıtyn adam joq. Úıli bolsa, ishi janǵa tolsa eken deıdi. Búgin sizder sol armandaryńyzǵa qol jetkizdińizder, endi ishi sábıdiń kúmis kúlkisine tolsyn, – dedi Qyrymbek Eleýuly.
Jańa qonysqa qol jetkizgen turǵyndar rızashylyqtaryn bildirip, alǵystaryn jetkizdi.
Aıta ketýimiz kerek, sońǵy tórt jylda Qyzylorda qalasynda 14 shaǵyn aýdan boı túzep, tek osy jyldyń ózinde 61 kóp qabatty úıdiń 24-i paıdalanýǵa berildi. Al sońǵy 4,5 jylda óńirdegi qurylys kólemi 3,5 esege, oblys ortalyǵynda 8 esege artty. Munyń syrtynda qanshama áleýmettik nysandar soǵyldy. Sonyń arqasynda, aımaqta apatty jaǵdaıda bilim berip jatqan mektepter de joq. Bul degenińiz úlken kórsetkish.
Erjan BAITILES, «Egemen Qazaqstan»
QYZYLORDA