Bala oıynmen ósedi. Qalalyq jerlerde bala oınaıtyn alań salý da qarjyǵa keletin is. Eýrazııalyq top (ERG) pen Qostanaı oblysy ákimdigi arasynda jasalǵan áleýmettik mańyzdy jobalardy iske asyrý týraly memorandým sheńberinde Oktıabr kentiniń jas turǵyndary, sondaı-aq osy kentte turatyn Eýrazııalyq top quramyndaǵy «Qazaqstan alıýmınııi» AQ fılıaly – Krasnooktıabr boksıt ken basqarmasy kenshileriniń balalaryna jańa oıyn alańy jabdyqtaldy.
Jobany iske asyrýǵa 3 mln teńge jumsaldy. Kent saıabaǵynda ártúrli sport qurylǵylary, átkenshekter, syrǵanaǵy men qumsalǵyshy bar zamanaýı balalar oıyn alańy ornatyldy. 324 sharshy metrdi alyp jatqan jańa oıyn alańy aınalasy birneshe kúnde boı kóterip, eski saıabaq jańa reńde túrlenip ketti. Jańa oıyn alańyn jastar men úlkender kórip úlgerdi.
– Balalarymyz úshin óte qýanyshtymyz, – dedi kent turǵyny Olga Rakıta. – Búldirshinderdiń júzinen de qýanyshty kórdik. Olarǵa arnap tamasha syı jasaǵandarǵa erekshe rızashylyǵymyzdy bildiremiz. Oıyn balasy taza aýada kóbirek ýaqyt ótkizeri sózsiz.
Bul «Týǵan jer – Rodnye goroda» baǵdarlamasy arqasynda kentte paıda bolǵan ekinshi oıyn alańy. Eki jyl buryn Selınnaıa kóshesinde birinshi oıyn alańy ornatylǵan bolatyn. Jobany iske asyrýǵa 2,3 mln teńge bólingen edi.
Sonymen qatar bıyl memorandýmǵa sáıkes baǵdarlama aıasynda Lısakov tehnıkalyq kolledjine arnaıy jabdyq – LCD paneli men plotteri satyp alyndy. Bul ken basqarmasy úshin mamandar daıarlaıtyn qaladaǵy jalǵyz arnaıy orta oqý orny bolyp tabylady. Oqý jyly basynan-aq kolledj- ge jetkizilgen jabdyqty pedagogtar synaqtan ótkizip, sabaqta paıdalanyp jatyr.
– ERG-diń «Týǵan jer – Rodnye goroda» aýqymdy korporatıvtik baǵdarlamasy aıasynda shaǵyn aýyldar men qalalar turǵyndarynyń, sondaı-aq kentte turatyn bizdiń eńbekkerlerdiń áleýmettik máseleleri men ótinish-tilekteri sheshimin tabýda, – deıdi Krasnooktıabr boksıt ken basqarmasynyń dırektory Sergeı Shelokov. – Kompanııa kúndelikti óndiristik máselelerdi ǵana oılamaı, jergilikti jerdegi áleýmettik máselelerdi sheshýge de atsalysady.
Eurasian Resources Group S.a.r.l. (ERG) pen Qostanaı oblysy ákimdigi arasynda 2017-2018 jyldarda áleýmettik mańyzdy jobalardy iske asyrýǵa baǵyttalǵan ózara yntymaqtastyq týraly memorandým sheńberinde óńirdi kórkeıtýge 8 mlrd teńge jumsalady. Osy qarajattyń bir bóligi Lısakov qalasy men Oktıabr kentindegi ıgilikti isterge jumsalǵan. Atap aıtqanda, úılerdiń aýlasyn abattandyrý, sý qubyry torabyn, aǵyn sýdy bıologııalyq tazartý stansasyn jańartý, Oktıabr kentinde jylytý torabyn jóndeý men gaz qazandyǵy qurylysyn júrgizý osy qarjynyń arqasynda múmkin bolady. sondaı-aq elektrkardıograf satyp alý josparda bar.
Sońǵy úsh jylda Oktıabr kentinde somasy 12,8 mln teńge bolatyn jasandy gazony bar shaǵyn fýtbol alańy salyndy, árqaısysynyń quny 1,5 mln teńge turatyn zamanaýı úsh avtobýs aıaldamasy ornatyldy. Lısakov qalasyndaǵy 7-shi shaǵyn aýdanda quny 11 mln teńge turatyn sport alańy qalalyqtardyń qýanyshyna aınaldy.
Názıra JÁRIMBET, «Egemen Qazaqstan»
Qostanaı oblysy, Lısakov qalasy