Ortalyq kommýnıkasııalar qyzmetindegi kezekti baspasóz máslıhatyna Almaty oblysynyń ákimi Amandyq Batalov qatysty. Onda óńir basshysy bıylǵy toǵyz aıdaǵy áleýmettik-ekonomıkalyq damý qorytyndylary men memlekettik baǵdarlamalardyń júzege asýy týraly baıandady. Amandyq Batalov aýyl sharýashylyǵy salasyndaǵy atqarylǵan sharýalar jaıynda da aıtty.
«Memleket basshysy atap ótkendeı, agrarlyq sektor ekonomıkalyq ósimniń qozǵaýshy kúshi bolýy kerek. Bul saladaǵy jalpy ónim kórsetkishteri oblysymyzdyń respýblıka boıynsha birinshi orynda turǵanyn aıǵaqtaıdy, ıaǵnı 17 paıyzdy quraıdy. Sózimdi naqty derektermen shegeleı tússem, búkil Qazaqstandaǵy soıanyń 97 paıyzy Almaty oblysynda ósiriledi. Júgeri men qant qyzylshasynyń 64 paıyzy, jemis-jıdektiń 37 paıyzy, kókónistiń 25 paıyzy, et ónimderiniń 20 paıyzy, sút ónimderiniń 13 paıyzy jáne jumyrtqanyń 23 paıyzy Jetisý jerine tıesili», dedi ákim.
Aýyl sharýashylyǵy daqyldarynyń kólemi 948 myń gektardy qurasa, onyń ishinde 17 paıyzdan astamy ozyq tehnologııalardy paıdalana otyryp óńdeledi eken. Aımaq basshysynyń sózine qaraǵanda, oblys búginde elimizdiń qyzylsha ósirý aımaǵyna aınalǵan.
Bıyl egistik aýdany 9 myń gektarǵa jetip úlgergen. «Kóksý» qant zaýyty úshinishi jyl óz jumysyn sátti aıaqtap, tolyqtaı jańartyldy. Jylyna 300 myń tonna ónim beretin «Aqsý» qant zaýyty da osy qatarda.