Seısenbi kúni jıyrmaǵa jýyq fýtbolshy men jattyqtyrýshylar quramy bar «Astana» komandasynyń músheleri «Nursultan Nazarbaev halyqaralyq áýejaıynan» ushaqqa otyrdy. Baǵyt – Izraıldiń Tel-Avıv qalasy. Araǵa alty saǵat salyp áýe kóligi Ben-Gýrıon atyndaǵy halyqaralyq áýejaıyna qondy.
Áýejaıdan birden Tel-Avıv mańyndaǵy shaǵyn kýrortty Netanııa qalasyndaǵy «Herods Herzliya» qonaqúıin betke aldy. Nege Netanııa qalasy deısiz ǵoı? Onyń sebebi bar. Búginde Tel-Avıvtegi «Blýmfıld» stadıony kúrdeli jóndeýden ótýde. Soǵan baılanysty «Makkabı» úıdegi oıyndaryn Netanııanyń ortalyq stadıonynda ótkizýge májbúr.
Keshe «Makkabı» men «Astana» komandalary ashyq jattyǵý jıynyn ótkizdi. Artynsha bas jattyqtyrýshylar baspasóz máslıhatynda jýrnalısterdiń suraqtaryna jaýap berdi.
Aldymen sóz alǵan «Makkabı» komandasynyń bas jattyqtyrýshysy Iordı Kroıf: «Meniń komandam erteńgi oıynǵa daıyn. Biz Qazaqstanda deńgeıimizdi tolyqtaı kórsete almadyq. Biraq erteń kezdesý basqasha jaǵdaıda órbıdi. Ketken eseni qaıtarýǵa múmkindigimiz tolyq jetedi», dedi ol.
«Eki apta buryn ǵana «Astanadan» 4:0 esebimen jeńilgen komanda az ýaqyt ishinde óz qate-kemshilikterin túzep, jeńiske jete ala ma?» degen saýalǵa gollandyq mamannyń bergen jaýaby mynadaı boldy: «Kez kelgen komanda úshin óz jankúıerleriniń aldynda óner kórsetken áldeqaıda jeńil.
Qazaqstanda ótken oıynda «Astana» shabýylshylary qorǵaýshylarymyzdy ábden ábigerge túsirdi. Biraq, erteń ondaı problema bolmaıtynyna senimdimin. О́ıtkeni, ketken kemshilik osy joly qaıtalanbas úshin jumys jasadyq. Erteń – sonyń jemisin kóretin kez».
Osydan keıin «Astana» komandasynyń bas jattyqtyrýshysy Stanımır Stoılov jýrnalıster saýalyna jaýap berdi. – Erteń biz úshin eń qıyn oıyndardyń biri bolmaq. Sebebi makkabılikter Astanada ketken eseni qaıtkende de qaıtarýǵa bilek sybana kirisetini belgili, dep bastady óz sózin bolgar mamany. – Onyń ústine, «Makkabı» óz alańynda ese jibermeıtin komanda. Áıtkenmen, bizdiń jigitter pleı-off kezeńine shyǵý úshin erteń jeńiske jetý kerektigin jaqsy biledi. Sondyqtan biz de shaıqasqa daıynbyz, – dedi Stoılov.
Jaraqatyna baılanysty oıynǵa qatysa almaıtyn fýtbolshylar bar ekenin aıtqan S.Stoılov aldaǵy josparlarymen de bólisti. «Biz birinshi kezekte Qazaqstan chempıonatyn jeńip alýymyz kerek. Sodan keıingi maqsatymyz – Eýropa lıgasynyń toptyq kezeńinen shyǵý. Eki baǵytta óner kórsetip jatqandyqtan, jasyl alańda úsh kún saıyn aıqasýǵa týra kelip tur. Bul jigitterge aýyr tııýde. Negizgi qorǵaýshymyz Iýrıı Logvınenko maýsym sońyna deıin bizge kómektese almaıdy. О́zimizge jeńil bolý úshin «Qaırattan» basym túsip chempıon ataný kerek edi. Alaıda, sol kúni almatylyqtardyń joly boldy. Endi jeksenbide «Aqjaıyqpen» ótetin matchta da barymyzdy salyp oınaımyz. Biraq, ol ekinshi másele. Birinshi kezekte erteńgi qıyn ári jaýapty kezdesýde qalaı da jeńiske jetýimiz kerek», dep oı túıdi S.Stoılov.
Esterińizge sala keteıik, «Astana» komandasy ÝEFA Eýropa lıgasynyń «A» tobynda 4 upaımen úshinshi orynda keledi. Birinshi, ekinshi oryndardy 5 upaıdan enshilegen «Slavııa Praga» men «Vılıareal» komandalary bólisip tur.
Almas MANAP, «Egemen Qazaqstan» – Netanııadan (Izraıl)