Búgin Hoshımınde (Vetnam) qyzdar arasynda bokstan Azııa chempıonatynyń jalaýy jetinshi ret kóteriledi. Saryqurlyqtyń eń myqty degen boksshy qyzdary qatysatyn bul dodaǵa qazaq burymdylary da tas-túıin daıyn.
Bokstan qyzdar quramasy sońǵy Azııa chempıonatynda bir altyn, úsh qola medal ıelendi. Qurama qorjynyna jalǵyz altyndy 75 kıloda synǵa túsken Darıǵa Shákimova salǵan-dy. Ol fınaldyq aıqasta qytaılyq qarsylasy Lı Sıandi aıqyn basymdyqpen utyp, Azııa chempıony atandy. Al Gaýhar Ermekbaı (69 kg), Móldir Bazarbaeva (81 kg) jáne Lázzat Kúngeıbaeva (81 kg-dan joǵary) saryqurlyq birinshiligin qola júldemen qorytyndylaǵan edi.
Bokstan qyzdar quramasy 2010 jyly elordada ótken birinshilikte tabysty óner kórsetken bolatyn. Sol jyly otandyq bylǵary qolǵap sheberleri tórt altyn, bir kúmis jáne úsh qola júldeni ıelengen. Atap aıtar bolsaq, Jaına Shekerbekova (54 kg), Saıda Hasenova (64 kg), Darıǵa Shákimova (75 kg) jáne Marına Volnova (81 kg-dan joǵary) – altyn, Nazgúl Boranbaeva (48 kg) – kúmis, Áıgerim Asqarova (51 kg), Elena Kolsova (69 kg) jáne Juldyz Mamatqulova (81 kg-ǵa deıin) – qola. Azııa birinshiligine 2008 jyldan beri qatysyp kele jatqan boksshylar jalpy sany 20 júlde aldy. Onyń beseýi altyn, tórteýi kúmis jáne 11 qola.
Bıylǵy dodada ujymnyń aldynda zor mindet, úlken jaýapkershilik turǵany aıtpasa da belgili. Qyzdar quramasynyń bas jattyqtyrýshysy Vadım Prısıajnıýk Vetnam sapary aldynda jýrnalısterge bergen suhbatynda elge eki altyn medalmen oralatynyn aıtty. «Menińshe, Eýropaǵa qaraǵanda Azııadaǵy qyzdar boksynda básekelestik óte myqty. Bıylǵy Azııa birinshiliginde bizge Úndistan, Ońtústik Koreıa jáne Qytaı quramasy laıyqty qarsylyq kórsetedi. Degenmen, bul dodaǵa elimizdiń eń myqty degen boksshylaryn alyp bara jatyrmyz. Shákirtterimniń daıyndyǵy da joǵary deńgeıde ótti. Barlyǵy saıysqa saqadaı saı. Buıyrsa, Vetnamnan eki altyn medalmen elge oralamyz degen úmittemin», dedi V.Prısıajnıýk.
Sonymen, 2-8 qarasha aralyǵynda Hoshımınde ótetin Azııa birinshiliginde Qazaqstan quramasy myna quramda synǵa túsedi: Rıo Olımpıadasynyń qola júldegeri, eki dúrkin Azııa chempıony Darıǵa Shákimova (75 kg), eki dúrkin álem chempıony Nazym Qyzaıbaı (51 kg), álem chempıondary Dına Jolaman (54 kg), Valentına Halzova (69 kg) jáne Lázzat Kúngeıbaeva (81 kg-dan joǵary), sondaı-aq Alýa Balqybekova (49 kg), Nazym Ishanova (57 kg), Rımma Volosenko (60 kg), Madına Nurshaeva (64 kg) jáne Móldir Bazarbaeva (81 kg).
Rıo Olımpıadasynyń qola júldegeri Darıǵa Shákimova aldaǵy Azııa chempıonatynda bapkerler tarapynan joǵary talap qoıylǵanyn aıtady. «Azııa birinshiligine qatysatyn kez kelgen qarsylasyma tolyq daıynmyn dep esepteımin. Degenmen, qarsylastarymdy tómen baǵalaǵym kelmeıdi. Byltyr álsiz bolǵan qarsylasym bıyl bir ornynda turyp qalmaı, daıyndyǵyn údetip, ár jekpe-jek saıyn myqty bola túsedi. Osy doda aldynda jattyqtyrýshylarymyz bizge tuǵyrdyń eń bıik satysynan kórinýdi tapsyrǵan. Buıyrsa, jattyqtyrýshylardyń tapsyrmasyn oryndaýǵa tyrysamyz», deıdi D.Shákimova.
Álı BITО́RE, «Egemen Qazaqstan»