«Astana» komandasynyń qorǵaýshysy Sergeı Malyı Eýropa lıgasy toptyq kezeńiniń 4-týry aıasynda «Makkabıge» qarsy oıyn jaıly pikir bildirdi.
– «Qaıratpen» ótken oıynnan keıin qandaı qorytyndy jasadyńyzdar?
– «Qaırat» – bizdiń tikeleı qarsylasymyz. Biz ol kezdesýde jeńiske jetip, ýaqytynan buryn chempıon atanǵymyz kelgen. Biraq bul fýtbol, biz kútpegen jaıttar jıi bolyp turady. Qazaqstan chempıonaty ońaı týrnır emestigine taǵy bir márte kóz jetkizdik. «Qaırat» Eýropa lıgasynyń komandalarynan osal emes dep aıtar edim.
– Erteń alańǵa birinshi mınýttan bastap shyǵasyz ba?
– Bul negizi bapkerime arnalǵan suraq. Eń bastysy alańǵa shyǵamyn dep úmittenemin. Negizgi qurammen shyǵý úshin ózimniń daıyn ekenimdi kórsetýim kerek.
– «Astana» alǵashqy kezdesýde «Makkabıdi» tas-talqan etip utty. Al qarymta kezdesýde ızraıldikter negizinen shabýylǵa kóńil bóletini belgili. Qarsy komandada kimnen kóbirek qaýip kútesiz?
– Árıne, biz ár oıynnyń aldynda taldaý jasaımyz. «Makkabı» jaqsy komanda. Munda myqty oıynshylar jeterlik. Biz árqaısysyn nazarda ustaıtyn bolamyz.
– «Astana» alǵashqy oıynda myqty komandalardy jeńe alatynyn dáleldedi. Al erteńgi oıynda teń esep jaqsy nátıje bolyp eseptele me?
– Bilmeımin, mundaı qorytyndyny toptyq kezeń aıaqtalǵannan keıin jasaýǵa bolady.
Almas MANAP, «Egemen Qazaqstan» – Netanııadan (Izraıl)