30 qazanda Astana jáne Almaty qalalarynda Elbasynyń qyzmetimen tyǵyz baılanysty jerlerde ótetin «Kóshbasshy joly» týrlary serııasynyń alǵashqy ekskýrsııasy bastaldy. Atalmysh is-shara Qazaqstan Respýblıkasy Tuńǵysh Prezıdenti – Elbasynyń Qory men «Kazakh Tourism» ulttyq kompanııasy» aksıonerlik qoǵamynyń qoldaýymen uıymdastyrylýda.
Týrlarǵa Almaty, Aqmola, Jambyl, Qaraǵandy, Pavlodar jáne Ońtústik Qazaqstan oblysynyń 13 jáne 17 jas aralyǵyndaǵy 480 úzdik oqýshylary qatysady.
Osylaısha, 30 qazan men 4 qarasha aralyǵynda Aqmola, Qaraǵandy jáne Pavlodar oblystarynyń oqýshylary Astanaǵa kelse, Almaty, Jambyl, jáne Ońtústik Qazaqstan oblysynyń úzdik balalary Almaty men Úshqońyrǵa barady.
Astanada oqýshylarǵa Qazaqstan Respýblıkasy Tuńǵysh Prezıdenti – Elbasynyń murajaıy, qory men kitaphanasy, Beıbitshilik pen kelisim saraıy, «Astana - Báıterek» monýmenti jáne Nazarbaev Ýnıversıteti kórsetiledi.
Almatylyq týrdyń baǵdarlamasy Almaty oblysyndaǵy Elbasy oqyǵan Qarasaı batyr atyndaǵy mektep, Qazaqstan Respýblıkasy Tuńǵysh Prezıdentiniń úı-murajaıy, «Batyr Babalar» memorıaldy kesheni, sondaı-aq Almaty qalasyndaǵy Ortalyq memlekettik murajaı, 28 panfılovshylardyń saıabaǵy sııaqty obektilerge barý josparlanǵan.
QR Tuńǵysh Prezıdenti - Elbasy qorynyń atqarýshy dırektorynyń keńesshisi Álııa Qaısharova: «Osyndaı týrlardy ótkizý mektep oqýshylarynyń oı-órisin keńeıtip, qyzyǵýshylyǵyn arttyrady, ári balalardy jaqsy oqyp, belsendi bolýǵa qosymsha yntalandyratyn bolady», - dep atap ótti.
«Nazarbaev ortalyǵynda» oqýshylardyń birinshi tobymen kezdesý barysynda «Kazakh Tourism» ulttyq kompanııasy» aksıonerlik qoǵamynyń Basqarma Tóraǵasynyń Orynbasary Qaırat Sadvaqasov osyndaı týrlardyń balalar men jasóspirimder týrızmin jandandyrýǵa, sondaı-aq elimizdiń jas urpaǵyn patrıottyq tárbıeleýine zor áser etetinin atap ótti: «Balalar men jasóspirimder týrlary jas urpaqtyń patrıottyq rýhyn qalyptastyrýda mańyzdy ról atqara otyryp, eldimizdegi ishki týrızmdi damytýǵa áser etedi».
Sondaı-aq, Q.Sadvaqasov EKSPO-2017 kórmesi kezinde elimizdiń óńirlerinen 185 myń mektep oqýshylary úshin 700-den astam týr uıymdastyrylǵanyn eske salyp ótti.