Astanada jyl basynan 282 pandýs ornatylyp, múmkindigi shekteýli azamattardyń yńǵaıy úshin birqatar kóshede taktıldi plıtalar tóseldi, dep habarlaıdy elorda ákimdiginiń medıa ortalyǵy.
Sońǵy statıstıkalyq málimetterge sáıkes, bıylǵy qańtar aıynan beri Astanada 705 nysan pasporttalsa, olardyń 474-i múgedekter úshin beıimdelgen. Atalmysh nysandar densaýlyq saqtaý, sport, mádenıet, bilim berý mekemelerine jatady. Olardyń ishinde shaǵyn ján orta bıznes nysandary da bar.
Budan basqa, kóptegen kásipkerler jergilikti bılik ókilderimen, prokýratýra organdarymen birlesip, múgedekter úshin shekteýsiz alań qurý isine atsalysyp jatyr. Sonymen qatar 2017 jyldyń basynan bastap Qazaqstannyń bas qalasynda 282 pandýs ornatyldy. Múmkindigi shekteýli azamattardyń yńǵaılylyǵy úshin A. Ahmatova, B. Beısekbaev, S. Seıfýllın jáne Oqjetpes kóshelerinde taktıldi plıtalar tóseldi. Elordanyń kóliktik kásiporyndary da múmkindigi shekteýli azamattar úshin qolaıly ortany qalyptastyrý isine óz úlesin qosýda.
Búgingi kúni qaladaǵy 1158 jolaýshylar kóliginiń 742-si kemtar jandardyń kólikke kirip-shyǵýyna arnalǵan qurylǵymen jaraqtalǵan. Tehnıkanyń qalǵan birlikteri qaıta jaraqtandyrýdan ótýge jaramsyz, sol sebepti olar jaqyn arada paıdalanýdan shyǵarylatyn bolady. Aıta keteıik, múgedekterdiń quqyqtaryn qorǵaý men olardyń ómirin jaqsartýǵa baǵyttalǵan memlekettik baǵdarlamanyń maqsaty qamqorlyqty qajet etetin azamattar úshin shekteýsiz orta qalyptastyrý bolyp tabylady.