Halqymyzdyń ejelgi ómir súrý daǵdysy men uǵym-túsiniginde qarashańyraq ataýynyń máni joǵary. Bul tirkes arǵy-bergi tarıhymyzdaǵy ózindik orny bar qasıetti ǵımarattarǵa nemese urpaqtar sabaqtastyǵyna oraı da qoldanyla beredi. Osy oraıda Aqtóbe qalasyndaǵy Ǵubaıdolla Aqtaev atyndaǵy qazaq orta mektebin óńir jurtshylyǵy qarashańyraq dep ataýy oryndy.
Búgingi tańda oblys ortalyǵynda 78 orta bilim beretin oqý orny bar ekenin eskersek, solardyń arasynda №6 mekteptiń eńsesi bıik, mártebesi joǵary. Qarashańyraq atanǵan bilim ordasyn ózgelerden aıryqshalap otyrǵan basty faktordyń biri – ustazdardyń ulttyq tárbıe ustyndaryn negizge ala otyryp, búgingi bilim berý modelimen ushtastyra bilýinde. Bir sózben aıtqanda, bul – qazaqy qalyptan ajyramaǵan, ulttyq salt-dástúrlerdi bilim men tárbıe berý isinde tý qylyp ustaı bilgen ulaǵatty oqý orny. Atalǵan oqý ornynan belgili tulǵalar túlep ushty. Olardyń qatarynda Jansen Kereev, Kım Serikbaev, Istaı Mámbetov, Rabıǵa Syzdyqova, Bákir Tájibaev, Erlan Karın sekildi elge eńbek etip júrgen azamattar.
Táýelsizdiktiń alǵashqy jyldarynda №6 qazaq-orta mektebiniń bazasynda tájirıbe retinde «Elim-aı» baǵdarlamasy júzege asyryldy. Osy ataýmen respýblıkalyq deńgeıdegi ádistemelik ortalyq qurylyp, onyń tájirıbesi ózge mektepterge úlgi-ónege retinde taratyldy. Osy kezden bastap munda orta bilim berý isiniń bilikti jetekshileriniń biri Zýra Qudaıbergenovanyń bastamasymen avtorlyq mektep jumys isteı bastady. Kóp keshikpeı mektep ókilderi qurastyrǵan úsh bólimnen turatyn «О́ner álippesi» oqýlyǵy jaryqqa shyqty.
Budan keıin qurylǵan «Jas Daryn» atty oqýshylardyń ǵylymı qoǵamynyń da jetken jetistikteri mol. Sol kezdegi mektep dırektorynyń oqý-ádisteme jónindegi orynbasary Kúlásh Qońyrbaevanyń baǵdarlamasy keıinnen halyqaralyq mańyzǵa ıe boldy. Osy qoǵamǵa múshe bolyp kirgen oqýshylardyń arasynan respýblıkalyq olımpıada jeńimpazdary men halyqaralyq ǵylymı jobalar jarysynyń júldegerleri shyqty.
Al qazirgi kúni qarashańyraqtaǵy oqý-tárbıe úderisiniń jaı-kúıi qandaı degen máselege kelsek, mektep dırektory Sholpan Janǵalıevanyń aıtýynsha, bul kórsetkish óńirdegi barlyq mektepter boıynsha jasalatyn kóp qyrly ári kóp baǵyttaǵy monıtorıngtik taldaýlardyń qorytyndylaryna saı belgilenbek.
1936 jyly oqý ornyna belgili keńestik marshal Klıment Voroshılov kelipti. Sol-aq eken, kóp keshikpeı mekteptiń ataýy onyń esimimen atalady. 1995 jyly Aqtóbe qalalyq máslıhatynyń sheshimine sáıkes, mektepke Ǵubaıdolla Aqtaevtyń esimi berilgen. Ol kisi qatardaǵy matematıka pániniń muǵalimi, dırektory bolyp qyzmet etip, pedagogıkalyq qyzmetiniń 37 jylyn osy mekteppen baılanystyrǵan elge syıly, biliktiligi mol, kózi tirisinde bıik parasat ıesi bola bilgen eken. Biz oqý-tárbıe úderisimen tanysý sátinde gazetimizdiń Aqtóbe oblysy boıynsha menshikti tilshisi qyzmetin atqarǵan áriptesimiz, marqum Ámir Oralbaıdyń Ǵubaıdolla Aqtaev jóninde «Ustaz ulaǵaty» dep atalatyn maqala jazǵany jónindegi derekke de tap boldyq. Keıin osy maqala atalǵan mektepke Ǵ.Aqtaevtyń esimi berilýine úlken qozǵaý salypty.
Qazirgi kezde mekteptiń materıaldyq-tehnıkalyq bazasyn odan ári jaqsartý máseleleri men qosymsha sabaqtar berý tártibi men kólemin ulǵaıtý joldary qarastyrylyp otyr. Qalaı degende de mekteptegi bilim sapasy deńgeıin odan ári kóterý tásilderin jetildire bermekpiz, deıdi Sholpan Serikbaıqyzy.
Temir QUSAIYN,
«Egemen Qazaqstan»
AQTО́BE