Energetıka mınıstri Qanat Bozymbaev 2017 jylǵy 1 qarashada «QazMunaıGaz» UK» AQ-tyń munaıdy tasymaldaý, qaıta óńdeý jáne marketıng boıynsha atqarýshy vıse-prezıdentiniń mindetin atqarýshy Danııar Tıesovtiń jáne «PMHZ» JShS bas dırektory Shýhrat Danbaıdyń qatysýymen Pavlodar munaı-hımııa zaýytyn jańǵyrtý barysy máselesi boıynsha jumys keńesin ótkizdi.
«PMHZ» JShS-de jańǵyrtýdy aıaqtaý jáne joǵary oktandy benzın men dızel otynyn shyǵarý úshin qajetti qondyrǵylardy iske qosý merzimderi boıynsha artta qalýshylyq belgili boldy.
Jańǵyrtýdy aıaqtaý merzimi «PMHZ» JShS úshin 26 qazan, al Atyraý munaı óńdeý zaýyty úshin 16 qyrkúıek belgilengen bolatyn. Alaıda «QazMunaıGaz» UK» AQ merzimderdi aǵymdaǵy jyldyń jeltoqsan aıynyń birinshi jartysyna aýystyrdy.
D.Tıesov pen Sh. Danbaıdyń aqparatyn tyńdap, mınıstr jaqyn arada joǵary oktandy benzınmen jáne dızel otynymen ishki naryqty qamtamasyz etý boıynsha shuǵyl sharalar qabyldaýdy tapsyrdy.
Atap aıtqanda, jekelegen qondyrǵylarda aqaýlardyń týyndaýy týraly usynylǵan derekterdiń negizinde Q. Bozymbaev munaı ónimderin óndirý qondyrǵylaryn ornatý merzimderi oryndalmaýy múmkin ekendigin eskertti.
Keńes qorytyndysy boıynsha mınıstr 8 qarashaǵa deıingi merzimde joǵary oktandy benzın shyǵarý qondyrǵylaryn jáne qysqa merzimde dızel otynyn shyǵarý qondyrǵylaryn iske qosý qajet ekendigin atap ótti.
«PMHZ» JShS-ni jańǵyrtýdy aıaqtaýdyń belgilengen merzimderi saqtalmaǵan jaǵdaıda, mınıstr top-menedjerlerdi atqaratyn qyzmetterinen bosatý týraly usynys engizetin bolady.
Mınıstr Pavlodar jáne Atyraý MО́Z-derinde obektilerdi jańǵyrtýdy sozý táýekelderin anyqtaý úshin mınıstrliktiń komıssııasyn jiberýdi tapsyrdy, dep habarlady Energetıka mınıstrliginiń baspasóz qyzmeti.