Búgingi tańda Aqmola óńirinde týrızmdi damytýǵa erekshe kóńil bólinýde. Úkimet tarapynan Shýche-Býrabaı kýrortty aımaǵyn damytýdyń úshinshi kezeńine arnalǵan jospar qabyldanýy máseleniń alǵa jyljýyna erekshe ekpin beredi. Bul jóninde arnaıy brıfıng ótkizgen Aqmola oblysy ákiminiń týrızm máseleleri jónindegi keńesshisi Marat Iǵalıev jáne oblystyq týrızm basqarmasynyń basshysy Shynarbek Batyrhanov málim etti.
Jalpy, osy kezge deıin jan jaqty zerdelenip qabyldanǵan «Four Seasons» jobasy óńirge týrısterdi tartýda óziniń nátıjesin bere bastaǵan. Joba aıasynda jazǵy mezgilde dástúrli halyqaralyq «Býrabaı-2017» jelkendi regaty da ótkizildi. Oǵan Qazaqstannyń ǵana emes, sonymen qatar Reseıdiń Ekaterınbýrg, Omby qalalary men ózge de óńirleriniń sportshylary qatysty. Tamyz aıynda oblys ákimdigi qoldaýymen Olımpıada chempıony, ataqty veloshabandoz A.Vınokýrovtyń qatysýymen ótken qaıyrymdylyq velojarysy da Býrabaı kýrortty aımaǵyna erekshe nazar aýdaratyny belgili.
Sharany ótkizý nátıjesinde 150 mıllıon teńge jınalsa, bul qarjy múmkindigi shekteýli balalarǵa qyzmet kórsetý ortalyǵyna medısınalyq qural-jabdyqtar satyp alýǵa baǵyttaldy. Sondaı-aq sońǵy jyldary Býrabaı kýrortty aımaǵy sheteldik meımandardy da qyzyqtyra bastapty. Ásirese, atqa minip, serýendeýdi unatatyndar qatary kóbeıip keledi eken. Olardyń arasynda Reseı, Túrkııa, Brazılııa jáne ózge de elderdiń azamattary kóptep kezdesedi.
Taza aýa aıasynda serýen qurýshylar motosıkldermen de saıahattap júretindigin brıfıng ótkizýshiler erekshe atady. Tarqatyp aıtqanda, «Elikti Park» taý shańǵysy bazasynda baıkerlerdiń sleti ótip, oǵan Qazaqstannan ózge Reseı, Ýkraına, Belarýs jáne Baltyq jaǵalaýy elderinen de kelip qatysypty. Mańyzdy oqıǵalardyń biri retinde Memleket basshysynyń qatysýymen ashylǵan golf-klýbynyń jumys isteı bastaýy da qaltaly týrısterdiń kelýine ózindik úlesin qosatyn bolady. Osyndaı ońdy is-sharalar arqyly týrızm salasyndaǵy bıznesti qoldaýǵa jaǵdaı jasalýda.
Qysqy týrızmge daıyndyq qazirden qolǵa alynyp, is-sharalar jospary túzildi. Ásirese «Qysqy ertegi» jobasyn iske asyrý arqyly demalýshylardyń kóńil kóterýine erekshe mańyz berilip otyr. Halyqaralyq konkýrs arqyly qysqy qalashyqtyń salynýyna úzdik sýretshiler, dızaınerler, músinshiler men ózge de shyǵarmashylyq ókilderi tartylady dep kútilýde. Ertegi qalashyǵy 3 aı qatarynan meımandardy qabyldamaq. Sonymen qatar «Ákem, anam, men – sporttyq otbasymyz» atty festıval uıymdastyrylyp, «Santa Klaýsta qonaqta bolǵanda» atty balalar baǵdarlamalary kópshilik nazaryna usynylady.
Aqmola oblystyq týrızm basqarmasynyń basshysy Sh.Batyrhanovtyń aıtýynsha, mundaı jobalardy júzege asyrý arqyly qazaqstandyq jáne sheteldik týrısterge Býrabaı kýrortty aımaǵy tartymdy bola túsedi. Nátıjesinde qyzmet kórsetý kólemi ósip, salyq túsimi ulǵaıyp, týrıstik salanyń damýyna ózindik úles qosady. Taǵy bir belgili bolǵany, qazirgi kezde Kókshetaý qalasynyń áýejaıy men reseılik Omby, Túmen, Ekaterınbýrg, Chelıabi jáne Sýrgýt qalalarymen tikeleı áýe qatynasyn ornatý týraly kelissózder jalǵasýda. Aqmola oblysy ákiminiń týrızm máseleleri boıynsha keńesshisi M.Iǵalıev qosymsha reısterdiń ashylýymen reseılik týrısterdiń Aqmola oblysyna kóptep kelýine jaǵdaı jasalatynyn jetkizdi.
Asqar TURAPBAIULY,
«Egemen Qazaqstan»
Aqmola oblysy