Búgin Ońtústik Qazaqstan oblysynyń ákimi Janseıit Túımebaevtyń tóraǵalyǵymen Shymkent qalasyn aýmaqtyq damytýdyń óńiraralyq jobasyn ázirleý máselesi boıynsha keńeıtilgen májilis ótti, dep habarlady OQO ákiminiń baspasóz qyzmeti.
Jıynǵa Báıdibek, Qazyǵurt, Ordabasy, Saryaǵash, Saıram, Túlkibas jáne Tólebı aýdandary men Shymkent, Arys qalalarynyń basshylary, sáýlet jáne qala qurylysy, oblystyq basqarma basshylary qatysty.
Jıynda sóz alǵan Respýblıkalyq memlekettik qala qurylysyn josparlaý jáne kadastr ortalyǵynyń bas dırektory Turlybek Musabaev Shymkent aglomerasııasyn aýmaqtyq damytýdyń óńiraralyq shemasy ázirlengenin jetkizdi.
«Ázirlengen jobaǵa sáıkes Shymkent aglomerasııasynyń aýmaǵy 1573,5 myń gektardy quraıdy. Shymkent aglomerasııasynyń aýmaǵynda 1,8 mln. turǵyny bar 367 eldi meken ornalasqan. Budan bólek, 5 myńnan astam turǵyny bar 35 eldi mekenniń bas jospary jasaqtalyp otyr», - dedi Turlybek Túrikpenuly.
Jańa ázirlengen jobaǵa sáıkes 2020 jylǵa qaraı Shymkent aglomerasııasyna jatatyn aýmaqta halyq sany 185093 adamǵa nemese 10,3 paıyzǵa artyp, 1 986 087 adamdy quraıdy degen boljam jasalyp otyr. Al 2030 jylǵa qaladaǵy halyq sany 534 779-ǵa kóbeıip, 2 mln 335 myń 773 adamdy quraıdy dep boljamdanýda.
Ázirlengen jobaǵa qanyqqan óńir basshysy tıisti sala basshylaryna ózgerister men usynystardy egjeı-tegjeıli taǵy da pysyqtap shyǵýǵa tapsyrma berdi.
«Shymkent qalasynyń aglomerasııasy osyǵan deıin birneshe ret keń kólemde talqylanǵan bolatyn. Osy maqsatta oblysymyzdaǵy tıisti basqarmalar tyńǵylyqty jumys júrgizip, ózgerister men usynystardy engizip shyqty. Endi bul jobamyzdy aldaǵy jeltoqsan aıynda Úkimettiń otyrysyna bekitýge usynatyn bolamyz. Sondyqtan áttegen-aı deıtindeı máseleler bolmaýy tıis» , - dedi Janseıit Túımebaev.
Aıta keteıik, Shymkent qalasyn aýmaqtyq damytýdyń óńiraralyq jobasyn QR Investısııalar jáne damý mınıstrligine qarasty Qurylys jáne turǵyn úı-kommýnaldyq sharýashylyq isteri komıteti ázirlegen bolatyn. Atalǵan jobaǵa sáıkes kontrmagnıtter retinde aýdandardyń da ákimshilik ortalyqtary anyqtalǵan. Ońtústik baǵytynda – Saryaǵash qalasy, batys baǵytynda – Arys qalasy, shyǵys baǵytynda – T.Rysqulov selosy bolyp belgilengen.