Oblys ortalyǵyndaǵy 2011 jyly ashylǵan №4 emhana Ýsolka shaǵyn aýdanynda ornalasqan. Bul aýdannyń ózi bir qalashyqqa aınalǵan, aýmaǵynda Ertis ózeniniń jaǵasynda birinen soń biri boı kótergen kóp qabatty úıler, Nazarbaev zııatkerlik mektebi, oblystyq balalar aýrýhanasy, kardıohırýrgııalyq ortalyq, №25 mektep, balabaqshalar men saýda ortalyqtary bar.
Avtobýs qatynasy turaqty, tramvaı júredi. Jarqyrǵan jańa emhana osy aýdan turǵyndarynyń medısınalyq qyzmetterge degen barlyq qajettilikterine saı qyzmet kórsetýde. Emhana kúnine 150 balany jáne 350 eresek adamdy qabyldaı alady. Oblysqa kelgen jumys saparynyń birinde Elbasy Nursultan Nazarbaev emhanany aralap kórip, dárigerlermen kezdesken bolatyn.
– Bul bizder, dárigerler úshin úlken qýanysh boldy. Emhananyń tarıhı erekshe kúni deımiz. Jańadan kelgen jas dárigerlerdi jumysqa qabyldaý kúni únemi osy sapar barysyn aıtyp, qyzmetterine sáttilik tileımiz, – deıdi emhananyń bas dárigeriniń orynbasary Botakóz Turǵanbaeva. – Osy jýyrda ǵana emhanada «Jas mamannyń mamandyqqa ıe bolýy» atty jyl saıynǵy dástúrli sharamyzdy ótkizdik.
№4 emhana qyzmetkerleriniń qataryn Shyńǵys Ýálıhanov, Saltanat Jumadilova, Rızagúl Qabdolla, Darıǵa Matkenova, akýsher-gınekologtar Zarına Amanqul, Gıýzal Jabaǵına, Olga Amanatıdı sekildi jas dárigerler tolyqtyrdy.
– Bul jas mamandar bıyl ǵana Semeıdegi medısınalyq joǵary oqý ornyn bitirip, dıplomdaryn alǵan. Olardyń aldynda halyq densaýlyǵyna jaýapty naǵyz kásibı mamandyq joly ashyldy. Sáttilik tileımiz, deıdi emhana ujymy.
Emhana jańa zamannyń medısınalyq qurylǵylarmen jaraqtandyrylǵan. Bólimshelik qyzmetter, ár sala mamandarynyń kabıneti, dıagnostıkalyq-zerthana kesheni, fızıoterapııalyq bólim jáne 30 orynǵa shaqtalǵan kúndizgi stasıonar bar. Sandyq rentgenografııa, flıýorografııa, rentgen dıagnostıkasy, mammografııalyq apparat, ýltradybysty zertteý skaneri jáne zamanaýı zerthana qurylǵysymen jabdyqtalǵan.
Endi jas dárigerlerge tájirıbeli mamandar tálimger bolady. Keshe ǵana stýdenttik aýdıtorııadan shyqqan mamannyń pedıatr, gınekolog, hırýrg sııaqty mamandyǵyna saı laıyqty eńbek etip, emhananyń tynys-tirshiligine úırenip ketýlerine qoldaý, kómek kórsetilýde. Jas mamandardy emhanaǵa qabyldaý kúnine T.Joldybaev, O.Prıhodko sııaqty ardager dárigerler kelip, naýqastardan tek alǵys alýǵa shaqyryp, aqyl-keńesterin aıtty. Shara sońynda jas mamandar «Jas dáriger» antyn qabyldady.
Farıda BYQAI, «Egemen Qazaqstan»
PAVLODAR