Lebıaji aýdany ishki saıasat bóliminiń habarlaýynsha, «Jumyspen qamtýdyń jol kartasy-2020» baǵdarlamasy aıasynda aýdan ortalyǵy Aqqýlyda salynǵan 24 páterli turǵyn úı qurylysyna oblystyq bıýdjetten 32 mıllıon teńge qarajat bólinipti.
Jergilikti merdiger fırma turǵyn úı qurylysyn kópke sozǵan joq. Qara sýyqqa qaldyrmaı, aınalasy úsh-tórt aıdyń ishinde salyp bitirdi. Aýdan ákimdiginiń sheshimimen, jańa úıdegi páterler birinshi kezekte «Dıplommen – aýylǵa!» baǵdarlamasy boıynsha aýdanǵa kelgen jas mamandarǵa berildi. Olar aýdandyq aýrýhanaǵa bıylǵy jyly kelgen Semeı medısınalyq akademııasynyń túlegi, akýsher-gınekolog Mádına Aıtqulova, hırýrg Saǵadı men onyń jubaıy akýsher-gınekolog Erkejan Ákimbekovterdiń otbasy, hırýrg Aıdos Nurbekov pen onkolog-dáriger Uljan Tólebaevanyń otbasy. Baıan-О́lgeı aımaǵynda dúnıege kelgen Lıza Murat Kentaýdaǵy ýnıversıtettiń medısına fakýltetin bitirip, qazir terapevt dáriger bolyp qyzmet etýde. Dárigerlermen birge Aqqýlydaǵy «О́ner» mektebine qyzmetke kelgen Mánshúk Qadysovaǵa, aýdandyq balalar úıiniń tárbıelenýshisi Iýrıı Sýrgýtanovqa da bir bólmeli páter berildi. Jańa páterler ortalyq jylý júıesine qosylǵan. Jastar úshin barlyq jaǵdaı jasalypty.
Sonymen birge «Dıplommen – aýylǵa!» baǵdarlamasy aıasynda ótken jyly aýrýhanaǵa qyzmet etýge kelgen jas maman dárigerler Qýat Aýlabaev, Aqbota Medeshova, Denıs Vınogorov, Aıdos Nurbekov, Jandos Nurbekov, Baqytjan Karapchın aýdan ákiminiń dıplomy men 500 myń teńgelik sertıfıkattarǵa ıe boldy. Ishki saıasat bóliminiń habarynsha, jas mamandarǵa berilgen 3 mıllıon teńge jergilikti ákimdik tarapynan bólingen.
Jalpy, óńirde bıylǵy jyly «Dıplommen – aýylǵa!» baǵdarlamasy aıasynda 151 jas maman aýyldarǵa barady dep josparlanǵan-dy. Mamandarǵa áleýmettik qoldaý kórsetý sharalaryn iske asyrý boıynsha bıýdjetten 513,9 mıllıon teńge bólý de qarastyryldy. Farıda BYQAI, «Egemen Qazaqstan»
Pavlodar oblysy, Lebıaji aýdany
Sýretti túsirgen Araı BOTABAEVA