«Rýhanı jańǵyrý» baǵdarlamasy aıasynda 19-23 qarasha aralyǵynda Los-Anjeles qalasynda (AQSh) Qazaqstan mádenıeti men kınosynyń kúnderi ótpek. Onda ár jyldardaǵy Qazaqstan kınematografynyń eń úzdik týyndylary usynylyp, jetekshi óner sheberleriniń qatysýymen gala-konsert beriledi.
Shara Qazaqstan Respýblıkasynyń AQSh-taǵy elshiligi, Qazaqstan Respýblıkasy Mádenıet jáne sport mınıstrligi jáne Qazaqstan kınematografııalyq óneri men ǵylymdary akademııasymen birlesip ótkizilmek. «Spirit of the Great Steppe» atalatyn bul sharanyń basty maqsaty – amerıkalyq kórermenderdi Qazaqstannyń baı ulttyq - mádenı murasymen tanystyrý.
Atalǵan sharaǵa Qazaqstannyń AQSh-taǵy elshisi - Erjan Qazyhanov, Qazaqstan Respýblıkasy Mádenıet jáne sport mınıstri - Arystanbek Muhamedıuly, Qazaqstan kınematografııalyq óneri men ǵylymdary akademııasynyń prezıdenti – Aıman Musaqojaeva jáne mádenıet pen kınematograftyń ózge de beldi qaıratkerleri qatysady.
– Qazaqstan Respýblıkasynyń mádenıeti men kınosynyń kúnderin AQSh-ta ótkizý amerıkalyqtardyń qazaq mádenıetine degen qyzyǵýshylyǵyn týdyratyny sózsiz. Sonymen qosa, Qazaqstan men Amerıkanyń mádenı baılanysynyń jańa kezeńi bolmaq, - dep atap ótti Qazaqstan Respýblıkasy Mádenıet jáne sport mınıstri Arystanbek Muhamedıuly. – «Qazaqstan Respýblıkasynyń mádenıeti men kınosynyń kúnderi AQSh - ta birinshi ret ótikizilip jatqan joq. Dese de, bul is-shara eki el arasyndaǵy mádenı qarym-qatynas tarıhynda qalatyny sózsiz! «Spirit of the Great Steppe» – «Uly Dala Rýhy » atty sharamyzdyń kózdegen maqsaty – amerıkalyq kórermenderin Qazaqstannyń baı ulttyq - mádenı murasymen tanystyrý bolyp tabylady. Osy shara aıasynda sizder, on altynshy ǵasyrdaǵy qos ǵashyqtyń ómirinen syr shertetin «Qyz Jibek» kınofılmin tamashalaı otyryp, qazaqtyń mádenı murasynyń bir bóligimen tanysasyzdar. Sonymen qatar, «Qazaq handyǵy. Almas qylysh» fılminde on besinshi ǵasyrdyń ortasyndaǵy qazaq tarıhy baıan etiledi. Uzaq jyldar boıy bastary birikpeı, shashyrap júrgen halyqtyń bir tý astyna jınalyp, óz ishinen han saılap el bolǵany sýretteledi.
AQSh-ta Qazaqstan Respýblıkasynyń mádenıeti men kınosynyń kúnderi 20 qarasha kúni, Saban teatrynda rejısser Aqan Sataevtyń «Anaǵa aparar jol» atty kórkem fılmimen saltanatty túrde ashylady. Kórsetilim aıaqtalǵannan keıin, Halyq artısi Aıman Musaqojaevanyń, halyqaralyq baıqaýlardyń laýreaty Edil Qusaıynovtyń, Qazaq Ulttyq óner ýnıversıtetiniń Eýrazııalyq Sımfonııalyq orkestriniń, «Shabyt» jáne «Aıgólek» atty ansamblderdiń qatysýymen úlken konsert ótedi.
– Qazaqstan kınosynyń sheteldegi kórsetilimi – bul Qazaqstandy saıası halyqaralyq arenada qarqyny joǵary memleket qana emes, zamanǵa saı, sapaly, kásibı kınokontent óndirýshi retinde tanytý. Muny elimizdiń memleketter arasyndaǵy kınematograf salasynda yntymaqtastyq ornatýǵa arnalǵan jarnamasy dese de bolady. Sonymen qosa, Qazaqstanǵa týrıster legin tartý úshin sheteldikterdiń bizdiń elmen tanysýlaryna múmkindik beredi. Elimiz, mádenıetimiz, tarıhymyz ben qol jetkizgen jetistikterimiz, salt-dástúrimiz jaıynda qoǵamda oń pikirlerdiń qalyptasýyna, memleketimizdiń halyqaralyq ornynyń nyǵaıýyna yqpal etpek, - dedi Qazaqstan kınematografııalyq óneri men ǵylymdary akademııasynyń prezıdenti Aıman Musaqojaeva.
Sondaı-aq, osy shara aıasynda, rejısser Sultan-Ahmet Qojyqovtyń «Qyz Jibek», «Balalyq shaǵymnyń aspany» jáne rejısser Rústem Ábdirashevtiń «Qazaq handyǵy. Almas qylysh» kartınalary usynylatynyn atap ótý kerek. Atalǵan fılmder qazaq tilinde aǵylshyn sýbtıtrlarymen kórsetiledi.