Elimizdiń Mádenıet jáne sport mınıstrligi baspasóz qyzmetiniń habarlaýynsha, bul kúnderi AQSh-tyń Los-Andjeles qalasynda Qazaqstannyń mádenıeti men kınosynyń kúnderi ótip jatyr. AQSh-taǵy Qazaqstannyń elshiligi jáne Qazaqstan kınematografııalyq óneri men ǵylymdary akademııasy uıymdastyrǵan bul shara Saban teatrynda Aqan Sataevtyń «Anaǵa aparar jol» fılmimen ashylǵan.
Fılmnen soń halyq ártisi Aıman Musaqojaevanyń, halyqaralyq baıqaýlardyń laýreaty Edil Qusaıynovtyń, álemdik deńgeıde óner kórsetip júrgen talantty ánshi Dımash Qudaıbergenniń, Qazaq ulttyq óner ýnıversıtetiniń Eýrazııalyq sımfonııalyq orkestriniń, sondaı-aq «Shabyt, «Aıgólek» ansamblderiniń qatysýymen úlken konsert ótken.
Los-Andjeleste «Spirit of the Great Steppe» – «Uly Dala rýhy» degen atpen ótip jatqan Qazaqstan mádenıeti men kınosynyń kúnderi týraly Mádenıet jáne sport mınıstri Arystanbek Muhamedıuly tómendegishe pikir bildirdi: «Elimizdiń mádenıeti men kınosynyń kúnderi AQSh-ta tuńǵysh ret ótip jatqan joq. Dese de bul joly amerıkalyqtarǵa kóbinde qazaqtyń tarıhynan habar berip, onyń ult retindegi keskin-keıpin kórsetetin fılmder usynyldy. Bul qazaq mádenıetine degen qyzyǵýshylyqty oıatatyny sózsiz. Sondaı-aq bul is-shara eki el arasyndaǵy mádenı qarym-qatynas tarıhynda jaqsy bir beles bolmaq».
Shynynda da amerıkalyq kórermenderge otandyq kıno óndirisiniń eń tanymal jáne óz kórermenderimizden oń baǵa alǵan fılmder usynylǵan. Onyń ishinde Sultan Qojyqovtyń jarty ǵasyrǵa jýyq ýaqyttan beri ekrannan túspeı kele jatqan, qazaq kıno óneriniń tólqujatyna aınalǵan «Qyz Jibek», Rústem Ábdirashtyń Elbasynyń ómirinen túsirgen «Balalyq shaǵymnyń aspany» jáne qazaq tarıhynyń taǵdyrsheshti kezeńderin órnektegen «Qazaq handyǵy. Almas qylysh» kórkem fılmderi bar.
Bul fılmderdiń barlyǵy Nıý-Iork kınoakademııasynyń Los-Andjelestegi fılıalynda aǵylshyn sýbtıtrlarymen qazaq tilinde kórsetiledi. Aýqymdy sharanyń aıasynda Nıý-Iork kınoakademııasynda oqıtyn qazaqstandyq stýdenttermen otandyq kınematografııa ókilderiniń kezdesýleri uıymdastyrylmaq.
Aıta keteıik, Los-Andjeleste ótip jatqan aıtýly sharaǵa elimiz tarapynan AQSh-taǵy elshi Erjan Qazyhanov, Mádenıet jáne sport mınıstri Arystanbek Muhamedıuly, Qazaqstan kınematografııalyq óneri men ǵylymdary akademııasynyń prezıdenti Aıman Musaqojaeva, KSRO jáne Qazaqstannyń halyq ártisi Asanáli Áshimov, halyq ártisi Quman Tastanbekov, Qazaqstannyń eńbek sińirgen ártisi Merýert О́tekesheva jáne basqa da esimi elge eleýli óner adamdary qatysýda.
Aıgúl SEIIL,
«Egemen Qazaqstan»