О́tken aptanyń demalys kúnderi Almaty oblysy Taldyqorǵan qalasy mańyndaǵy Syrymbet taýynyń baýraıynda saltanatty salbýryn bolyp, aýyl turǵyndary men elimizdiń túkpir-túkpirinen jáne Qytaı men Mońǵolııadan arnaıy kelgen qonaqtar úsh kún boıy Altaıdyń aqıyǵy, Boǵdanyń qarageri, Narynnyń aqshegiri, Kóksheniń muzbalaǵy, Saýyrdyń sabalaq sarysy syndy 48 búrkit, 4 qarshyǵa, 4 ıtelgi qatysqan halyqaralyq qansonardyń qyzyǵyna batty.
Alǵashqy kúni qolǵa shaqyrý, shyrǵaǵa túsirý boıynsha iriktelgen búrkitterdi erteńinde qoıanǵa, úshinshi kúni túlkige saldy. Al, qarshyǵa men ıtelgini kepter men qoıanǵa jiberdi. Ár búrkittiń túlkige ártúrli túsýi, keıbiriniń ustap alyp aıyrylyp qalýy, taǵy biriniń aınalyp kelip tomaǵaly búrkitke túsýi, endi bir búrkitti ustaǵan túlkisinen ajyrata almaı alańnan alǵan ańymen qosa kóterip alyp ketýi syndy kórinister jınalǵan jurtqa óte qyzyqty bolsa kerek, ózderi qus salǵandaı aıqaılap, taǵaty taýsylǵandar tóreshilerge «jón siltep» te jatty.
Fınalǵa shyqqan jeti búrkitke kórsetilgen túlkilerdiń úsheýi qutylyp ketti. Ekeýi ustap aıyrylsa, bir búrkit jete berip, taıqyp shyǵyp tóbege qondy. Búrkittiń tegeýrinine ilinbeı taýǵa tartyp bara jatqan túlkini ońaı jibere salǵysy kelmegen kórermender ózge qusbegilerge, «búrkitińdi jiber de, jiber» dep aıqaılap-aq baqty. Alaıda, ereje boıynsha bir túlkige bir ǵana búrkit jiberiledi. Baby kelmegen nemese týmysynan nashar búrkit jiberilse, ol – túlkiniń baǵy. Ondaıda túlki qutylýy kerek. Bul ań aýlaýdaǵy qazaq boıyndaǵy ejelden kele jatqan ádilettilikti kórsetse kerek!
Bul qansonardyń burynǵy qansonarlardan taǵy bir ózgesheligi – qusbegiler arasynda asaý úıretý, kókpar, jamby atý, aýdaryspaq jáne án-kúı, óleń-jyrdan ónerlerin ortaǵa salý boldy.
«Qazaqta «jigitke jeti óner de az» degen sóz bar. Qustyń tilin taýyp, ań ildirgen azamattardan at ústindegi barlyq óner jáne burynǵy sal-serilerimizdiń boıyndaǵy án men kúı, óleń men jyrdyń da tabylýy kerek dep, osy joly ádeıi sal-serilerimizdiń atyndaǵy syılyqtar daıyndadyq», deıdi, «Qyran» federasııasynyń atqarýshy dırektory, «Jalaıyr Shora» qusbegiler mektebiniń irgetasyn qalaýshylardyń biri Baǵdat Múptekeqyzy.
Sol jeti óner boıynan tabylǵan Táttimbet Kápulyna Birjan sal atyndaǵy, Aldabergen Sháripovke Aqan seri atyndaǵy, Dýlat Aqanovqa Qapez sal atyndaǵy arnaıy júlde tabystaldy.
Sonymen Syrymbet taýynyń baýyryn qyzyqqa bóktirgen qansonarda kil qyrypsal qyrandar qanjyǵa maılady. Búrkitter básekesinde astanalyq Kúntýǵan Serikbaıdyń «Tuıǵyn» atty búrkiti I oryndy ıelendi. II oryndy atyraýlyq Arman Kúshqarovtyń «Aqedili» enshilese, III oryn jambyldyq Serikbolsyn Jalǵasulynyń «Qapsalǵanyna» buıyrdy.
Qarshyǵalardyń saıysynda almatylyq Seıitjan Beksultannyń «Kókjendet» atty qarshyǵasy I oryndy ıelendi. Jambyldyq Babajan Berikbolsynnyń «Qanjary» II oryn, Almatylyq Rınat Myrzabaevtyń «Alaý» atty qarshyǵasy III oryn aldy.
Qusbegiler jarysyn qorytyndylaýǵa ulttyq sporttyń qamqorshylary Oralbaı Əbdikərim, Qanat Ahmetov, Baǵdat Múptekeqyzy, Almaty oblysy ákiminiń orynbasary Jaqsylyq Omar jáne «Qyran» federasııasynyń prezıdenti Nurlan О́nerbaı jáne basqalar qatysyp, jeńimpazdarǵa syılyq tabystady.
Bul qansonardy «Jalaıyr Shora» qusbegilik mektebiniń 30 jyldyǵyna oraı Mədenıet jəne sport mınıstrligi Sport jəne deneshynyqtyrý komıtetiniń, Ulttyq sport túrleri qaýymdastyǵynyń jáne «Qansonar» ańshylardyń qoǵamdyq birlestikteri men ańshylyq sharýashylyǵy sýbektileriniń respýblıkalyq qaýymdastyǵynyń qoldaýymen Almaty oblystyq týrızm, deneshynyqtyrý jəne sport basqarmasy men «Qyran» federasııasy uıymdastyrdy.
Qyrandardyń patshasy búrkit «Aspanda ushsam qanatym talady, jerge qonsam Jalaıyr Shora alady» dep jylaıdy eken», deıdi el arasyndaǵy ańyz. Osy bir aýyz sózben esimi búginge jetip, atynda mektep ashylyp, sol bir aýyz sóz arqyly osy bir aıryqsha qabilettiń ıesi bizdiń atalarymyz ekenine kózimizdi jetkizdik emes pe?! Sodan da ol qalyqtaı samǵap kelip kók aspannyń astyndaǵy máńgilik eldiń kók baıraǵynda máńgi qalqyp turǵandaı!
Ularbek NURǴALYMULY, «Egemen Qazaqstan»
Sýretterdi túsirgen Serik NURDYBAI