«Qazaqstan temir joly» ulttyq kompanııasy» AQ-ta Ǵylymı-tehnıkalyq basqarýdyń avtomattyq júıesi platformasynda «Elektrondy sandyq kitaphana» jobasy júzege asyrylmaq. Ǵylymı-tehnıkalyq aqparat jáne saraptaý ortalyǵynyń dırektory Natalııa Smolıanovanyń aıtýynsha, sıfrly tehnologııaly kitaphana jobasyn júzege asyrý «iOS» jáne «Android» operasııalyq júıesine mobıldi qosymsha engizý arqyly tehnıkalyq aqparattarǵa kompanııa qyzmetkerleri álemniń kez kelgen túkpirinde júrip qol jetkize alady.
«Qazirgi kezde ǵylymı-tehnıkalyq basqarýdyń avtomatty júıesindegi korporatıvtik jeli arqyly aqparattarǵa, normatıvtik-tehnıkalyq qujattarǵa, beınekonferensııa derekterine qol jetkizýge bolady. Sonymen qatar bul ortalyqtyń barlyq baǵyttaryn praktıkalyq túrde avtomattandyryp qana qoımaı, aqparattyq, baspalyq, murajaılyq bilim qorynyń qoımasy bolyp ta qala beredi», deıdi N.Smolıanova.
Avtomattandyrylǵan júıe turaqty túrde tolyqtyrylatyn málimetterden turady. Onyń ishinde elektrondy oqýlyqtar, kitaptar, bezendirilgen sholýlar, 70 túrli basylymdaǵy temir jol salasyna arnalǵan ózekti taqyryptaǵy tolyq mátinder, beınefılmder, quqyqtyq-normatıvtik qujattar, kórshiles memleketterdiń temir jol salasyndaǵy úzdik tehnıkalyq jáne tehnologııalyq jańalyqtary jarııalanady.
Ǵylymı-tehnıkalyq aqparat jáne saraptaý ortalyǵy dırektorynyń habarlaýynsha, kompanııa mundaı aqparattyq tehnologııany Temir joldar yntymaqtastyǵy uıymyna múshe elderdiń ishinde alǵashqy bolyp bastap otyr. Birqatar temir jol ákimshilikteri aqparattyq júıeni avtomattandyrý boıynsha tájirıbe almasýǵa qyzyǵýshylyq bildirýde.
Qazirgi tańda kompanııanyń tehnıkalyq kitaphanasy qorynda júzden astam merzimdi basylymdar men 800 myńnan astam kitaptar bar. Kelesi jyly SAP, bıznesti transformasııalaý, IT-tehnologııa, logıstıka, personaldy basqarý jáne tehnologııalyq ádebıetter satyp alynady. «Aqparattyq tehnologııalardy óndiriske engizý «QTJ» qyzmetkerleriniń biliktiligin jetildirýge eleýli úles qosady. Jumys tıimdiligin kóteredi», deıdi ortalyq basshysy N.Smolıanova.
Ashat RAIQUL,
«Egemen Qazaqstan»