Eger úlkendi-kishili deńgeıdegi atqarýshy organdarda qyzmet jasaıtyn jetekshi tulǵalar ózine tikeleı tapsyrylǵan mindetterdi salaqsytyp jiberse, nemese ózine júktelgen jaýapkershilikti sezinbese –sógis alýy ábden múmkin. Sondaı-aq qoǵamdyq ómirde sógis ózge de árqıly jaǵdaılarda jarııalanady. Aqtóbe oblysy ákiminiń baspasóz qyzmeti laýazymdy tulǵaǵa daǵdyly tájirıbeden tys berilgen erekshe bir sógis jóninde jergilikti basylymdar arqyly aqparat taratty.
Aqtóbe oblysynyń kadrlyq komıssııasynyń sheshimi boıynsha aıyryqsha tártiptik jaza qarǵaly aýdanynyń ákimi Rahat Sydyqovqa berilgen. Ne úshin? Aıdyń, kúnniń amanynda ne búldirip qoıdy eken? Atqaryp júrgen qyzmetinde bir shıkilik bolǵany-aý shamasy. Joq, munyń biri de emes, gáp basqada bolyp shyqty. Ol Aqtóbe oblysynyń ákimi Berdibek Saparbaevtyń Qarǵaly aýdanyna sapary kezinde ústirttikte urynǵan. Naqtyraq aıtqanda R.M.Sydyqov oblys basshysy atalǵan aýdanǵa qarasty Badamsha aýylynda turǵyndarmen kezdesý sátinde ala-qulalyqqa jol bergen. Aýdan ákimi bul basqosýǵa tek bir ǵana jergilikti memlekettik qyzmetshiler men shaǵyn jáne ortasha bıznes ókilderin jáne kásipkerlerdiń ǵana shaqyrylýyna túrtki bolypty. Sógisti sol úshin arqalapty.
Buǵan ne deýge bolady? Árıne munyń ózi tek bir ǵana Qarǵaly aýdanynń ákimi Rahat Sydyqovtyń tarapynan kezdesken kemshilik desek, shyndyqtan alshaqtaý ketip qalarmyz. О́zge óńirlerde de osyǵan uqsas kórinister kezdesip qalyp júrgeni de jasyryn emes. mundaı syńarjaq ustanym kezdesýge kelip otyrǵan jergilikti atqarýshy organdar jetekshileriniń abyroıyna daq túsirýi múmkin ekenin de joqqa shyǵara almasaq kerek. Ekinshiden laýazymdy tulǵa men betpe-bet pikir alysýǵa tek «shtattaǵy sheshender» men memlekettik qyzmetshilerdiń shaqyrylýy –el-jurttyń arasynda ár túrli alyp-qashpa pikirler týǵyzýy da ǵajap emes.
Káne, áńgimeniń ashyǵyna keleıikshi? Respýblıkadaǵy oblys ákimderi úlken laýazymdy tulǵa emes pe? Oblys ortalyǵynan shalǵaı ornalasqan jergilikti eldi-mekenderde turatyn qarapaıym halyqtyń óńir basshysynyń qabyldaýyna kirýine múmkindigi bola bermeıtini belgili. Ekinshiden olardyń bárin qabyldaýǵa oblys ákimderiniń jumys kestesi sáıkes bolmaıtyny taǵy da túsinikti.
Sonda jergilikti turǵyndar kókeıde júrgen oılary men tilekterin osyndaı kezdesýlerde aıtpaǵanda qaıda aıtady? Áıtse de keıbir jaǵdaılarda el-jurttyń ókilderi oǵan shaqyrylmaı qalady. Áńgimeniń qysqasyel turǵyndary men bılik ókilderi arasynda tikeleı ún qatysýlar bolǵan jaǵdaıda ózara túsinistik odan ári tereńdeı túspeı me? Qarǵaly aýdanynyń ákimi Rahat Sydyqovqa óńirlik kadrlyq komıssııanyń sheshimimen sógis jarııalanǵanyn jergilikti baspsóz betterinen oqyǵan kezde osyndaı oılar kelip edi kókeıge. Bul jáıtterden onyń ózge áriptesteri tıisti sabaq alsa ıgi.
Temir Qusaıyn
«Egemen Qazaqstan»
Aqtóbe