Tarbaǵataı aýdanynyń Ekpin aýylynda ataqty shopan, Sosıalıstik Eńbek Eri, aýyl sharýashylyǵynyń ozaty Saılaýbek Taýshaev degen aqsaqal turady.
Adal eńbegimen el qurmetine bólengen qarııany jerlesteri jaqsy bilgenimen, ol kisiniń Elbasymen bir emes, úsh ret kezdesip, aýylǵa tamasha ǵımarat saldyrýǵa úles qosqanyn kópshiligi bilmeýi de múmkin. Bul jaıynda sál keıinirek. «Ákemiz shopan boldy, mal baqty. Kózimizdi ashyp kórgenimiz mal bolǵandyqtan eńbekke erte aralastyq. Bes jasymnan aıaǵyma shaqaı tartyp, ógiz minip, úlkenderge septestik. 1969 jyly Aqsýat orta mektebin bitirgennen keıin úsh jyl shopan boldym», dep bastady áńgimesin qart shopan.
Áýelde shopan kómekshisi, keıin aǵa shopan bolǵan keıipkerimiz 1976 jyly qoı ósirýshi komsomol jastar brıgadasyna jetekshilik etedi. О́nimi kól-kósir túliktiń qyr-syryna bala jastan qanyq jan brıgadany basqarǵan kezde jospardy asyra oryndap, júz qoıdan 120-140-qa deıin qozy alady. Eńbegi eskerilip, eki márte Lenın, bir márte Eńbek Qyzyl Tý ordenderimen marapattalady. 1982 jyly 34 jasynda Sosıalıstik Eńbek Eri atanady. 1984-1989 jyldary Qazaq KSR Joǵarǵy Keńesiniń depýtaty bolyp saılanady. Elbasymen, naqtyraq aıtsaq, sol shaqtaǵy elimizdiń Mınıstrler Keńesiniń Tóraǵasy Nursultan Nazarbaevpen kezdesetini osy kez. «Depýtat bolǵan kezimde týǵan jerge, ósken elge qoldan kelgen kómegimdi jasaýǵa tyrystym. Sol kezdegi aýdandyq partııa komıtetiniń birinshi hatshysy Turanǵazy Qobaev degen azamattyń aqyl-keńesimen Ekpin aýylyna mektep saldyrý máselesimen Nursultan Ábishulynyń aldyna úsh ret bardym. Bilim ordasy ońaılyqpen salynǵan joq. Ol kezde kóp dúnıe Máskeý arqyly sheshiletin. Bul rette Respýblıka Mınıstrler Keńesiniń Tóraǵasy úlken járdem kórsetip, mekteptiń boı kóterýine tikeleı yqpal jasady. Sol ýaqyttary Aqsýatta áýejaı men et kombınaty salynyp, talaı jumystar atqaryldy», deıdi el aǵasy.
Eńbek Eri alashtyń birtýar perzenti Dinmuhamed Qonaevpen de birneshe márte kezdesip, dıdarlasyp, pikirlesedi. Bir kezdesýinde Almatyǵa kóshkisi keletinin aıtyp, páter suraǵanda Dımekeń: «Baspana osy qalada turatyn jandarǵa ǵana beriledi. Zańdylyǵy solaı. Eger úıli bolǵyń kelse, balalaryńnyń birin osynda oqyt, tirkeýge qoı. Oqý jaǵyna da járdemdesemiz» dep ýáde etkenimen 86-nyń sarsańy shopan tileginiń oryndalýyna múmkindik bermegen sekildi.
Baqytyn eńbekten tapqan qarııanyń ómirlik jary Baqythan Qusaıynova on balany dúnıege ákelgen Batyr ana. 1991 jyly «Batyr ana», 2004 jyly Prezıdent Jarlyǵymen «Altyn alqa» ıegeri atanǵan ǵazız jan qartaıdym dep qarap otyrǵan joq. Qazaqtyń bekzat óneri – oıý-órnek jasaýmen shuǵyldanady. On saýsaǵy maıysyp, kórpe-jastyqtyń túr-túrin tigedi. Qyzdary men kelinderin de qolónerge baýlyp keledi. «Sovet zamanynda qarapaıym eńbek adamdaryna erekshe kóńil bólindi ǵoı. Qazir de Elbasymyzdyń eńbek adamdaryn esten shyǵarmaıtyny qýantady», – deıdi Saılaýbek Taýshaev.
Azamat QASYM, «Egemen Qazaqstan»
Shyǵys Qazaqstan oblysy, Tarbaǵataı aýdany.