Jyl aıaǵy – bir jyl boıy istelgen istiń esebi beriler ýaqyt qana emes, atqarylǵan sharýalar nátıjesiniń kórinis tabar mezgili. Jeltoqsan týa qazaq dalasyn jer-jerde ashylyp jatqan jańa nysandar men ár túrli jetistikter týraly habar sharlap ketetini bar. Súıinshi suraýdan, bárekeldi aıtýdan jarysqa túsetin bir shaq osy kez. Munyń ózindik sebebi de joq emes. Jyl qorytyndylanyp keledi. Onyń ústine, jaqsylyǵymyzdyń ózin sársenbiniń sátine, qasıetti jumaǵa týralaǵymyz kelip turatyny taǵy bar. Al, jeltoqsannyń basy merekemen bastalady. Bul kúni Qazaqstan óz aldyna el bolýdyń basy dep tuńǵysh basshysyn saılapty. Yrymdaýǵa jaqsy sebep. О́ńir ákimderiniń qaı-qaısysy da sóziniń álhamyn «Elbasy bergen tapsyrma boıynsha» dep bastaıtyny taǵy bar. Ár óńir basshylyǵy elge jasaǵan jaqsylyǵyn, bitirgen isi men jetken jetistigin – Tuńǵysh Prezıdent kúnine jasaǵan syı retinde usynýǵa tyrysady.
Jazda ǵana 18 mıllıonynshy qazaq ómirge keldi. Onyń aldynda ǵana 2 mıllıonynshy turǵynynyń tusaýyn kesken Jetisý jeri jalpy qazaqtyń sanyn 18 mıllıonǵa jetkizgen sábıdiń týǵan jurty retinde súıinshi surady. Ákimshilik qaladan jastardyń qalasyna aınalyp kele jatqan Taldyqorǵanda páter jaldap turyp jatqan jas otbasy osyndaı erekshe qýanyshtyń ıeleri retinde qalaǵan aýdannan qalaǵan úıin (qaı qabattan alatynyn da) tańdap alatyn bolyp kelisilgen. Oblys ákiminiń syıy. Mereke qarsańynda – osy úı tabys etildi.
Taldyqorǵanda 64 jáne 55 páterli kópqabatty eki turǵyn úıdiń ózge ıeleri de Prezıdent kúnimen birge qonys toıyn toılady. Kópshiliktiń qýanyshyn bólisken oblys ákimi Amandyq Batalov quttyqtaý sózinde:
– Búginde, Qazaqstan Respýblıkasynyń Tuńǵysh Prezıdenti kúni qarasańynda, men sizderge saltanatty túrde jańa páterlerińizdiń kiltin tabystaǵanyma qýanyshtymyn. Osynda turǵan barshańyzdyń ómirlerińizdegi eń jarqyn sátterdiń biri bolatyn búgingi qýanyshtaryńyzben barshańyzdy shyn júrekten quttyqtaımyn, – dedi.
Oblys boıynsha qatar keletin qos merekege oraılastyryp otyrǵan 700 is-shara ótkiziledi dep kútilýde. Merekelik sharalardyń jóni bólek. Oblys basshylyǵy qandaı qýanyshty da qurǵaq atap ótpeıtinin aıtyp otyr. Bas-aıaǵy 20 kúnniń ishinde 100 áleýmettik mańyzy bar nysan iske qosylmaq.
Tuńǵysh Prezıdent kúni qarsańynda oblysta 350-ge jýyq shara ótkiziledi dep josparlanǵan. 5 mektep ashylyp, 30 ýchaskelik polısııa beketi, dárigerlik ambýlatorııa jáne memleket-jekemenshik áriptestikpen iske qosylatyn balabaqshalar ashylyp, el ıgiligine berilip jatyr. Sonyń ishinde, Memleket basshysynyń týǵan jeri Shamalǵan aýylynda ashylǵan «Atameken» tarıhı-mádenı ortalyǵynyń orny bólek. Nursultan Nazarbaevtyń balalyq shaǵy, erjetýi, eńbekke, bılikke aralasýy, Qazaqstannyń táýelsizdik alýy jáne damý, ósý kezeńderinen syr shertetin keshen Táýelsizdiktiń tarıhı shejiresi ispetti. Qazaqstan Respýblıkasynyń Tuńǵysh Prezıdenti qory, kitaphanasy men mýzeıi, Prezıdenttiń Is basqarmasy, Ulttyq kitaphana men Ulttyq akademııalyq kitaphanadan alynǵan jádigerlerden turatyn tarıhı-ólketaný kesheniniń qorynda Prezıdenttiń 90-ǵa jýyq jeke zattary men 250-den astam túrli kitap bar.
Jalpy quny 18,5 mıllıard teńgeni quraıtyn mańyzdy nysandardyń eń negizgileri mektepter men balabaqshalar, sport alańdary men mádenı ortalyqtar jáne úıler. 1-16 jeltoqsan aralyǵynda jospar boıynsha 5 mektep, 6 balabaqsha, 7 mádenı ortalyq, 11 turǵyn úı men turǵyn úıler kesheni merekege tartylǵan úlken syı bolmaq.
Almas NÚSIP,
«Egemen Qazaqstan»
Almaty oblysy