Búgin Qasym-Jomart Toqaevtyń tóraǵalyq etýimen Parlament Senatynyń Bıýro otyrysy ótti. Bıýroda Májilisten túsken zań jobalary komıtetterge bólinip berildi, dep habarlaıdy Senattyń baspasóz qyzmetinen.
Agrarlyq máseleler, tabıǵatty paıdalaný jáne aýyldyq aýmaqtardy damytý komıteti «Jer qoınaýy jáne jer qoınaýyn paıdalaný týraly» Kodeksiniń jobasy jáne zańnamaǵa jer qoınaýyn paıdalaný máseleleri boıynsha túzetý engizetin zań jobasy boıynsha bas komıtet bolyp belgilendi.
Konstıtýsııalyq zańnama, sot júıesi jáne quqyq qorǵaý organdary komıtetine «Qazaqstan Respýblıkasyndaǵy baǵalaý qyzmeti týraly» jáne «Qazaqstan Respýblıkasynyń keıbir zańnamalyq aktilerine baǵalaý qyzmeti máseleleri boıynsha ózgerister men tolyqtyrýlar engizý týraly» zań jobalary boıynsha usynystaryn jınaqtap, qorytyndy ázirleý tapsyryldy.
«Memlekettik aýdıt jáne qarjylyq baqylaý týraly» zań jobasyna túzetýler engizý boıynsha Qarjy jáne bıýdjet komıteti bas komıtet bolyp belgilendi.
Bıýroda Palatanyń 2017 jyly 7 jeltoqsanda ótetin kezekti otyrysynyń kún tártibi boıynsha usynystar da engizildi jáne saıası-qoǵamdyq jáne ekonomıkalyq mańyzy zor zań jobalary talqylandy.
Senatorlar Qazaqstan Respýblıkasy men Halyqaralyq qaıta qurý jáne damý banki arasyndaǵy (Ońtústik-Batys avtomobıl joldaryn damytý jobasy: Batys Eýropa – Batys Qytaı halyqaralyq tranzıt dálizi) qaryz týraly kelisim-hatty ratıfıkasııalaý týraly zań jobasyn; Táýelsiz Memleketter Dostastyǵyna qatysýshy memleketterdiń avtokólik quraldaryn jymqyrýǵa qarsy kúrestegi jáne olardy qaıtarýdy qamtamasyz etýdegi yntymaqtastyǵy týraly kelisimdi ratıfıkasııalaý týraly zań jobasyn; Zańnamaǵa quqyq qorǵaý qyzmetiniń prosestik negizderin jańǵyrtý máseleleri boıynsha túzetýler engizý týraly zań jobasyn; «Salyq jáne bıýdjetke tólenetin basqa da mindetti tólemder týraly» kodeksiniń jobasyn; Zańnamaǵa salyq salý máseleleri boıynsha túzetýler engizý týraly zańynyń jobasyn qaraıtyn boldy.